Rusiya qaz borusunu bağlayarsa, Almaniyada qaz neçə müddətə kifayət edəcək? - "Bloomberg" nəşri
Almaniya mavi yanacağa qənaət edilməsi ilə bağlı təcili tədbirlər görür.
Əgər Rusiya Avropaya qaz tədarükünü tamamilə dayandırarsa, Almaniyada qaz 3 aydan da az müddətə kifayət edəcək.
Almaniyanın energetika sektorunu nizamlayan Federal şəbəkə agentliyinin prezidenti Klaus Müller buna əmindir.
Bu barədə Amerikanın "Bloomberg" nəşri məlumat yayıb.
Müllerin sözlərinə görə, noyabr ayına qaz ehtiyatlarının 95 faizədək doldurulması yaşayış sektoru, sənaye və energetika müəssisələrinin isitmə sisteminin tələbatını təxminən 2-2, 5 aya ödəmək mümkün olacaq. Hal-hazırda ehtiyatlar 77 faiz doldurulub.
Müller vurğulayıb ki, əgər Rusiya qaz tədarükünü indi dayandırarsa, Almaniyada isitmə sistemini, enerji təchizatını və sənayenin işini təmin etmək yalnız 1, 5-2 ay ərzində mümkün olacaq.
"Biz qaz saxlancı yerlərimizi əvvəlkinə nisbətən daha tez doldururuq. Lakin bu o demək deyil ki, arxayınlaşmaq olar. Əksinə, buna təkan kimi baxmaq lazımdır. Mən Almaniyada bütün saxlanc yerlərinin noyabradək hətta tələb və təklifin yaxşı şəraitində də 95 faiz doldurulacağını vəd edə bilmərəm", - Müller deyib.
Yaranmış vəziyyətlə bağlı Almaniya hakimiyyəti mavi yanacağa qənaət edilməsi üzrə təcili tədbirlər həyata keçirir- sənayeçilərə və əhaliyə mavi yanacağa qənaət etməyə çağırış edir, habelə onun istifadə edilməsinə vergi tətbiq edir.
Güman edilir ki, belə tədbirlər istehlakçıları yanacağın alternativ növlərinə keçməyə həvəsləndirəcək.
"Bloomberg" yazır ki, Rusiya qazının "Şimal axını-1" vasitəsilə tədarükü borunun keçirmə qabiliyyətinin cəmi 20 faizini təşkil edir.
Almaniya hakimiyyəti bunu Rusiyanın Almaniyaya qaz ixracını "istənilən zaman" dayandıra biləcəyinin əlaməti hesab edir.
Böhranın yumşaldılması üçün Almaniya daha çox sıxılmış qaz almağa başlayıb. Həmçinin nüvə reaktorlarının işindən mərhələli şəlildə çıxmaq planına yenidən baxılır.
AES-də elektrik istehsalı ölkədə mavi yanacağa 3 faiz qənaət etməyə imkan verəcək. Bu zaman Almaniyaya qazın baş tədarükçüsü ölkəsi kimi Rusiyadan Norveçə keçib. Əvvəllər Norveç Almaniya üçün qazın beşdə bir hissəsini tədarük edib, lakin bu il onun payına təxminən 30 faiz düşüb.
