Rusiya-Azərbaycan ticarət dövriyyəsi kəskin artıb
Azərbaycan ilə Rusiya arasında ticarət dövriyyəsi kəskin artıb.
2022-ci ilin yanvar-sentyabr aylarında Azərbaycan ilə Rusiya arasında ticarət dövriyyəsi 2 milyard 538 milyon 206 min dollar təşkil edib. Bu da ötən ilin eyni dövrü ilə müqayisədə 23,6 faiz çoxdur.
Bu ilin 9 ayında Azərbaycan Rusiyadan 1 milyard 910 milyon 699 min dollarlıq məhsul idxal edib. Bu, ötən ilin eyni dövrü ilə müqayisədə 32,6 faiz çoxdur. Azərbaycanın ümumi idxalının 18,56 faizi Rusiyanın payına düşüb.
Hesabat dövründə Azərbaycanın Rusiyaya ixracı isə 627 milyon 507 min dollar təşkil edib. Bu da keçən ilin müvafiq dövrü ilə müqayisədə 2,2 faiz çox deməkdir. Ölkənin ümumi ixracının 2,13 faizi Rusiyanın payına düşüb. Ticarət dövriyyəsinin artmasının əsas səbəbi kimi pandemiya məhdudiyyətlərinin ləğv olunması göztərilir.
Xatırladaq ki, 2021-ci ildə Azərbaycan ilə Rusiya arasında ticarət dövriyyəsi 2020-ci illə müqayisədə 12,1 faiz artaraq 2 milyard 995 milyon 131 min dollara çatıb. Keçən il də Azərbaycana ən çox mal Rusiyadan gətirilib.
