ETTELAAT-ın başçısı Səudiyyə Ərəbistanı hədələdi - "Strateji səbrimiz” tükənə bilər"

İranın informasiya və kəşfiyyat naziri (ETTELAAT) Seyid İsmayıl Xətib regional rəqibi Səudiyyə Ərəbistanına xəbərdarlıq edərək deyib ki, Tehranın “strateji səbrini” davam etdirməsinə heç bir zəmanət yoxdur.

“Reuters”in Fars Xəbər Agentliyinə istinadla verdiyi məlumata görə, ETTELAAT-ın başçısı bildirib ki, İran indiyədək möhkəm rasionallıqla strateji səbir nümayiş etdirib, lakin hərbi əməliyyatlar davam edərsə, onun bitməyəcəyinə zəmanət verə bilməz: “Əgər İran qisas almaq və cəzalandırmaq qərarına gəlsə, şüşə saraylar dağılacaq və bu ölkələrdə daha sabitlik olmayacaq”.

İran qadınlara tətbiq etdiyi sərt geyim qaydalarını pozduğu iddiası ilə həbs edilən iranlı kürd qadın Məhsa Əmininin sentyabr ayında polis nəzarətində ölməsindən sonra xarici düşmənləri iğtişaşları qızışdırmaqda ittiham edib.

Cəmiyyətin müxtəlif təbəqələrindən olan iranlıların etirazları 1979-cu il İslam İnqilabından sonra İranın ruhani liderləri üçün ən böyük problemlərdən birinə çevrilib.

Keçən ay İran İnqilab Keşikçiləri Korpusunun rəhbəri Hüseyn Səlami Səudiyyə Ərəbistanına media orqanlarına nəzarət etməsi barədə xəbərdarlıq etmişdi: “Səudiyyənin hakim ailəsinə xəbərdarlıq edirəm: Davranışınıza baxın və bu mediaya nəzarət edin... əks halda bunun əvəzini siz ödəyəcəksiniz. Bu bizim son xəbərdarlığımızdır, çünki siz bu media vasitəsilə dövlətimizin işlərinə qarışırsınız. Biz sizə dedik ki, ehtiyatlı olun!"

Ötən həftə “Wall Street Journal”ın Ər-Riyadın İranın krallıqdakı hədəflərə gözlənilən hücumu barədə ABŞ ilə kəşfiyyat məlumatı paylaşması xəbərindən sonra İran Səudiyyə Ərəbistanı üçün təhlükə olduğunu təkzib edib.