İrəvan sülh müqaviləsi ilə bağlı qərar verə bilmir - Qriqoryandan ziddiyyətli açıqlamalar

“Ermənistan Azərbaycanla Qarabağ ermənilərinin təhlükəsizliyinə beynəlxalq zəmanət verən sülh müqaviləsi bağlamağa çalışır. İrəvan məhz belə bir müqavilə versiyası təklif edir”.

Bu barədə “Civilnet” kanalına müsahibəsində Ermənistanın Təhlükəsizlik Şurasının sədri Armen Qriqoryan bildirib.

“Biz bu variantda sülh müqaviləsi bağlayırıqsa, mümkün təxribatların qarşısını alırıq, təklif edilən mexanizmlər isə beynəlxalq zəmanət yaradır”, – deyə o bildirib.

Qriqoryan xatırladıb ki, Azərbaycan sülh müqaviləsinin 5 bəndini, daha sonra isə daha ətraflı mətn təklif edib. Onun sözlərinə görə, Ermənistan tərəfi çərçivə müqaviləsinin mətnini hazırlayıb və noyabrın 7-də Vaşinqtonda XİN başçılarının görüşündə təqdim edib.

“Bu, hərtərəfli mətndir və Ermənistan və Azərbaycan arasında problemləri həll edə bilər”, – deyə o bildirib.

Rusiyanın təklifləri haqqında suala cavabda Qriqoryan bu təkliflərin Soçidə müzakirə olunduğuna, amma Bakının israrı ilə çıxarıldığına eyham edib.

Onun sözlərinə görə, Ermənistan və Azərbaycan arasında 4 böyük mövzu var, onların da alt mövzuları var: “Birincisi humanitar məsələlər, bütün əsirlərin tezliklə azad edilməsi, ikincisi kommunikasiyaların açılması, daha sonra delimitasiya, sərhəd təhlükəsizliyi komissiyalarının işi və “dağlıq Qarabağ probleminin” həllidir”.

Qriqoryan sülh müqaviləsi barədə danışarkən ziddiyyətli açıqlamalar verib. Gah bildirib ki, Qarabağda qalan ermənilərlə bağlı “ problemin” necə həll ediləcəyi dəqiqləşdirilmədən sülh müqaviləsi bağlamaq qeyri-mümkündür.

Daha sonra isə Qarabağda qalan ermənilərlə bağlı “problemi” sülh müqaviləsinin bir hissəsinə çevirmək mümkün olmadığını, bunun üçün də həmin məsələsinin sülh müqaviləsi prosesindən ayrılmasının mümkünlüyünün müzakirə olunduğunu bildirib.

Belə görünür ki, siyasi orientasiyasını müəyyənləşdirməkdə çətinlik çəkən İrəvan Azərbaycanla sülh müqaviləsi bağlayıb-bağlamamaq məsələsində də qərar verə bilmir(azpolitika.info).