"Bu qədər böyük süni zəlzələ yaratmaq mümkün deyil" - Mütəxəssis
“Zəlzələ ocağı olmasa, süni zəlzələ yaratmaq olmaz. Bu, mümkün deyil”.
Bunu Seysmoloji Xidmət Mərkəzinin Seysmologiya şöbəsinin müdiri Tahir Məmmədli deyib.
O bildirib ki, atom bombası partladıldıqda ondan böyük enerji ayrılır ki, o da silkələnməyə səbəb olur: "Bu atom bombalarının titrəyişləridir, zəlzələ deyil. Bu titrəyişlər qısa olur, uzun müddət davam etmir. Ancaq təbii zəlzələdə xırda təkanlar olur".
Tahir Məmmədlinin sözlərinə görə, mütəxəssislər süni zəlzələni asanlıqla təbiidən fərqləndirə bilirlər:
"Bunu ayırd etmək üçün seysmoloqların xüsusi metodu var, Türkiyədə baş verən zəlzələ həddindən artıq böyük fəlakətdir. Deyirlər ki, bu zəlzələ süni zəlzələdir. Doğru olmayan fikirlərdir. Bu, süni deyil, təbii zəlzələdir. Bunu seysmoloqlar asanlıqla ayırd edirlər. Türkiyədə baş verən zəlzələnin ocağının ölçüsü təxminən 100 kilometrə yaxındır. Qeyd edim ki, maqnituda nə qədər böyük olarsa, zəlzələ bölgəsinin miqyası da genişlənir. Süni zəlzələ yaratsalar belə, bu qədər böyük ölçüdə etmək mümkün deyil. Çünki atom bombasının əmələ gətirdiyi titrəyiş bundan çox kiçikdir. Bu qədər dağıntıya yol aça bilməz”.
