Yerevan Laçında nəzarət-buraxılış məntəqəsinin yaradılması ideyasına qarşıdır

Ermənistan kommunikasiyaları açmağa hazırdır, lakin onlar ölkə qanunvericiliyi çərçivəsində fəaliyyət göstərməlidir. Bu barədə çərşənbə günü Ermənistanın xarici işlər naziri Ararat Mirzoyan Laçında və Zəngəzur dəhlizinin hər iki ucunda nəzarət-buraxılış məntəqəsinin yaradılması ilə bağlı Azərbaycan prezidentinin bəyanatını şərh edərkən deyib.

"Bizim cavabımız birmənalıdır və Laçın dəhlizinin bağlanmasından dərhal sonra bunu bəyan etdik. Laçın dəhlizinin fəaliyyəti Azərbaycan prezidentinin də imzaladığı üçtərəfli sənəddə razılaşdırılıb. Laçın dəhlizilə bağlı güc tətbiqilə və ya onun tətbiqinə dair hədələrlə yeni danışıqlar bizim üçün qəbuledilməzdir", – Mirzoyan deyib.

Eyni zamanda, "Ermənistan istənilən an yolları aça bilər, ancaq bu, bütün yolların keçdikləri ölkələrin suverenliyi və qanunvericiliyi çərçivəsində fəaliyyət göstərəcəyi razılaşdırıldıqdan sonra baş verə bilər", -Mirzoyan sözlərinə davam edib.

Lakin o izah etməyib ki, niyə Laçın dəhlizində Azərbaycan qanunları qüvvədə olmamalıdır, halbuki, bu, onun suveren ərazisidir.