Bakı Fransa Xarici İşlər Nazirliyinin bəyanatını pisləyib...
Fransa aprelin 11-də Ermənistan-Azərbaycan sərhədində, Ermənistanın Tex yaşayış məntəqəsi ərazisində baş vermiş zorakılıq nəticəsində hər iki tərəfdən 7 nəfərin ölməsi və yaralıların olması ilə bağlı dərin narahatlığını bildirib. Bu barədə Fransa Xarici İşlər Nazirliyinin 12 aprel tarixli bəyanatında deyilir.
"Fransa xatırladır ki, demarkasiya yalnız danışıqlar yolu ilə həyata keçirilməlidir və tərəfləri bu istiqamətdə səylərini davam etdirməyə çağırır.
Ermənistanın ərazi bütövlüyünə hörmət və Azərbaycan qüvvələrinin təmas xəttinin erməni tərəfində işğal olunmuş mövqelərdən çıxarılması gələcək insidentlərin qarşısının alınması və regionda sabit sülhün əsaslarının qorunması üçün vacibdir.
Fransa sərhədin Ermənistan tərəfində yerləşdirilmiş və gərginliyin azaldılmasında mərkəzi rol oynayan Avropa İttifaqı müşahidəçi missiyasının fəaliyyətini tam dəstəkləyir və yardım göstərir. Fransa atəşkəsə riayət olunması, Ermənistanla Azərbaycan arasında dialoq və danışıqların davam etdirilməsi naminə Avropa İttifaqı ilə birgə fəaliyyətini davam etdirəcək", - bəyanatda deyilir.
Buna cavab olaraq Azərbaycan Xarici İşlər Nazirliyi Parisi erməni separatizmini və revanşizmi dəstəkləməkdə ittiham edib.
Fransanın Avropa və Xarici İşlər Nazirliyinin Ermənistan-Azərbaycan sərhədində hərbi eskalasiya ilə bağlı bəyanatı reallığı əks etdirmir, ədalətli deyil və qərəzlidir. Bu barədə Azərbaycan Azərbaycan Xarici İşlər Nazirliyinin 13 aprel tarixli şərhində deyilir.
Bakıda hesab edirlər ki, Fransa Xarici İşlər Nazirliyinin bəyanatı "Erməni tərəfinin aprelin 11-də Laçın rayonunda Azərbaycan mövqeləri istiqamətində törətdiyi erməni təxribatının dəstəklənməsinə yönəlib və işlərin real vəziyyətinə uyğun deyil".
“25 ilə yaxın müddətdə Azərbaycan-Ermənistan münaqişəsində vasitəçi olan Fransa Ermənistanın təcavüzünə və işğalçı siyasətinə qiymət verməyib”, - Azərbaycan Xarici İşlər Nazirliyi hesab edir.
Bakı Parisi Ermənistan-Azərbaycan münaqişəsində qərəzli və ədalətsiz mövqedə ittiham edib.
“Ermənistanı Azərbaycanın ərazi bütövlüyü və suverenliyinə hörmət etməyə çağırmayan, Azərbaycan ərazilərindən erməni silahlı qüvvələrini çıxarmağı Ermənistandan tələb etməyən Fransanın birtərəfli əsasda yalnız Ermənistanın ərazi bütövlüyünə hörmət edilməsinin vacib olduğunu bildirməsi Fransanın ölkəmizə qarşı qərəzinin nümunəsidir”, - şərhdə deyilir.
Rəsmi Bakı Fransanı Ermənistanı növbəti təxribatlara təhrik edən, revanşist qüvvələrə dəstək verən bu kimi bəyanatlardan çəkinməyə çağırıb.
