Pentaqonun məxfi sənədləri necə ələ keçirilib?
Pentaqon sənədlərinin sızdırılmasında şübhəli bilinən Cek Teyşeyra məxfi materialların qanunsuz surətini çıxarmaq və ötürməkdə ittiham olunub. Ona qarşı yüzdən çox ittiham irəli sürülə bilər.
Boston məhkəməsində Massaçusets Hava Milli Qvardiyasının 21 yaşlı əsgəri iki casusluq əməlində ittiham olunub. Onlardan biri məxfi müdafiə materiallarının qanunsuz surətinin çıxarılması və ötürülməsi, digəri isə müdafiə materiallarının icazəsiz yerə qanunsuz daşınması ilə bağlıdır.
Qeyd olunur ki, indiyədək Teyşeyranın ittihamı yalnız Ukraynadakı müharibənin vəziyyətini təsvir edən və qoşunların yerdəyişməsi ilə bağlı təfərrüatları əks etdirən sənədlə bağlıdır.
Ekspertlərin fikrincə, müstəntiqlər dərc olunan hər bir sənədi ayrıca tədqiq edəcəklər. Casusluq Aktının bircə dəfə pozulması on ilə qədər həbs cəzasını nəzərdə tutur.
Məhkəmədə dinləmə qısa çəkib. Teyşeyra susmaq hüququnun olduğunu deyib, ona ictimai müdafiəçi təyin edilib, prokuror təqsirləndirilən şəxsin məhkəməyə qədər həbsə alınmasını istəyib. Bu məsələyə çərşənbə günü, aprelin 19-da məhkəmə baxacaq. Teyşeyra və ailəsi jurnalistlərə açıqlama verməyib.
Teyşeyra 13 aprel cümə axşamı Massaçusetsdəki evində saxlanılıb. Bundan əvvəl “The Washington Post” xəbər vermişdi ki, şübhəli şəxs Discord messencerində 20-30 nəfərlik söhbətin iştirakçıları ilə gizli məlumatları paylaşıb. Onların dünyadan daha çox xəbərdar olmalarını istədiyini bildirdi.
FTB agenti bildirib ki, Teyşeyra 2021-ci ildən məxfi materiallara çıxış əldə edib. Mütəxəssislər deyirlər ki, gənc əsgərin nə üçün belə yüksək səviyyəli klirensiyaya malik olması sualı açıq qalır - buna ABŞ Müdafiə Nazirliyi qərar verməlidir.
“Reuters”in məlumatına görə, ABŞ-ın yüzdən çox məxfi sənədləri açıqlana bilər. Olay 2010-cu ildə “WikiLeaks” saytında 700 000-dən çox sənəd, video və diplomatik rabitənin dərcindən sonra ən ciddi qalmaqal hesab olunur. Pentaqon məlumatın sızdırılmasını “qəsdən cinayət əməli” adlandırıb.
