"ABŞ Ukraynada müharibəni dondurmaq üçün Koreya ssenarisini nəzərdən keçirir" - "Politico " nəşri

“Vaşinqton Ukraynanın rus işğalçılarını öz ərazisindən çıxara bilməyəcəyi bir ssenariyə hazırlaşır. ABŞ hakimiyyəti iki hissəyə bölünmüş Koreya nümunəsini əsas götürərək, Rusiya-Ukrayna müharibəsinin dondurulmuş münaqişəyə çevrilmə ehtimalını nəzərdən keçirir”.

Bunu ABŞ-ın “The Politico” nəşri Vaşinqtondakı mənbələrinə istinadla yazıb.

Xəbərdə qeyd olunur ki, artıq Ağ Evdə və ABŞ-ın digər səlahiyyətli orqanlarında Ukrayna və Rusiyanın pozmamağa razılaşacağı demarkasiya xəttinin mümkün konfiqurasiyaları ilə bağlı ilkin müzakirələr aparılıb.

“Nə Kiyevin, nə də Moskvanın məğlubiyyətini etiraf etməyə meylli olmadığını nəzərə alsaq, uzunmüddətli perspektivdə ən real ssenari budur. Bu, həm də Rusiyaya ölümcül zərbə vurmayacaq”, - “Politico” yazır.

Qeyd edilir ki, dondurulmuş münaqişə Kiyevə dəstək xərclərini azaldacağından, bu, ABŞ və Ukraynanın digər tərəfdaşları üçün siyasi baxımdan uzunmüddətli məqbul nəticə hesab oluna bilər. Bunun müqabilində Ukraynaya ABŞ və NATO ilə uzunmüddətli təhlükəsizlik əlaqələri təklif olunacağı bildirilir.

“Politico” bu müzakirələrin ilkin mərhələdə olduğunu, ABŞ rəsmilərinin müharibənin hələ bir müddət də davam edəcəyini gözlədiklərini, hələlik Bayden Administrasiyasının Ukraynanı lazımi silah və dəstəklə təmin etmək niyyətində olduğunu yazır.

ABŞ rəsmiləri hesab edirlər ki, kobud səslənsə də, Ukraynada Koreya ssenarisindən istifadə oluna bilər.

Qeyd olunur ki, Koreya münaqişəsində aktiv döyüşlər 1953-cü ildə atəşkəslə başa çatsa da, müharibə rəsmən yekunlaşmayıb.