"Qərb Ukraynaya köhnə və istifadayə yararsız silahlar verir" - "The New York Times" nəşri

Qərb Ukraynaya kömək adı altında köhnə və işlək vəziyyətdə olmayan hərbi texnikalar göndərib.

Bu barədə ABŞ-ın nüfuzlu “The New York Times” nəşri məlumat yayıb.

Nəşr Ukraynaya göndərilən silahları araşdırdığını və təəccüblü bir nəticə əldə etdiyini açıqlayıb.

Belə ki, ABŞ nəşri Ukraynaya bağışlanan silahların bir çoxunun pis və istifadəyə yararsız vəziyyətdə olduğunu iddia edib. Eyni məlumatda qeyd olunub ki, Kiyevin arsenalının 30 faizi hazırda təmirdədir.

Nəşr bu yaxınlarda İtaliya hökumətinin Ukraynaya hədiyyə etdiyi 33 özüyeriyən “haubitsa”nı misal çəkib. Bildirib ki, Ukrayna hələ də bu silahları təmir etməyə çalışır.

Ukrayna hökumətinin rəsmi sənədlərində göstərilir ki, Müdafiə Nazirliyi 33 “haubitsa”nın təmiri üçün ABŞ şirkətinə 19,8 milyon dollar vəsait ödəyib. Həmin sənədlərə əsasən, bu “haubitsa”lardan 13-ü yanvar ayında Ukraynaya göndərilib, lakin döyüş tapşırıqları üçün yararsız olduğu müəyyən edilib.

Yazıda Ukrayna hərbi strukturlarındakı yüksək vəzifəli mənbələrə istinadla bildirilir ki, ötən ilin sonlarında pulu ödənilən 800 milyon dollarlıq silah sifarişi müxtəlif kateqoriyalar üzrə ya qismən, ya da bütövlükdə yerinə yetirilməyib.

“The New York Times” iddia edir ki, Ukrayna hərbi rəhbərliyi ordunun xarici silahlarla tam təmin olunduğu barədə yaradılan təsəvvürlə reallıq arasında fərq olduğunu göstərmək məcburiyyətindədir. Çünki bir çox xarici tərəfdaşlar öz öhdəliklərini vicdanla yerinə yetirmir.

NYT yazır ki, Pentaqon sözügedən məsələ ilə bağlı araşdırmalara başlayıb.