"İranla mümkün yeni nüvə sazişi ehtimalı dünya azərbaycanlılarını narahat edir" - "Frontpage Magazine" nəşri
ABŞ-ın geniş oxucu kütləsinə malik nüfuzlu “Frontpage Magazine” jurnalında “Azərbaycanlılar İranla mümkün yeni nüvə sazişini qınayırlar” sərlövhəli məqalə dərc olunub.
Tanınmış israilli poitoloq və jurnalist, Dona Qrasiya Diplomatiya Mərkəzinin təsisçisi və baş direktoru Reyçel Avrahamın qələmə aldığı məqalədə bildirilir ki, İran tərəfindən uranın zənginləşdirilməsinin azaldılması müqabilində ABŞ hökuməti molla rejimi ilə ona qarşı sanksiyalarını yüngülləşdirəcəyi yeni nüvə sazişi bağlamaq niyyətindədir. Bu sazişə qarşı çıxan İsrail rəsmiləri ilə eyni cəbhədə dünyəvi müsəlman ölkəsi olan Azərbaycan və Güney Azərbaycan müxalif diasporu də yer alır. Müəllif İranla həmsərhəd olan Azərbaycanın İsrail dövlətinin və ABŞ-ın müttəfiqi olması səbəbindən Vaşinqtonun ayətullah qaragüruhu ilə hər hansı nüvə sazişi bağlamazdan əvvəl ölkəmizin mövqeyini nəzərə almasını labüd hesab edir.
Azərbaycan diasporunun, o cümlədən güney azərbaycanlı dissidentlərin fikirlərinin yer aldığı məqalədə qeyd olunub ki, Tehran rejiminə nəfəs vermək ideyasının özü mollaları nüvə bombası yaradaraq İsrail və Azərbaycan kimi digər ölkələri təhdid etməsinə daha çox imkan yaradacaq. ABŞ hökuməti güney azərbaycanlıların milli haqlarının daim tapdanmasını, onlara qarşı molla rejiminin törətdiyi qətl və təzyiqləri unutmamalıdır.
Həmçinin qeyd olunub ki, ABŞ Tehranla danışıqlar aparmamalı və molla rejiminin əl-qol açmasına imkan verməməlidir. İranın bütün nüvə proqramını dayandırmağa məcbur etmək, onun İsrailə, Azərbaycana, regionda və dünyada demokratiyaya qarşı terroru dəstəkləmə fəaliyyətinə son qoymaq lazımdır. Bu mənada ABŞ hökuməti hər hansı sövdələşmədən əvvəl regiondakı müttəfiqlərinin maraqlarını nəzərə almalıdır. İsrailli politoiloq bu qənaətdədir ki, Azərbaycanın İrana münasibətdə mövqeyi dünya ictimaiyyətinin dəstəyinə layiqdir. Molla rejiminin yeganə məntiqli siyasəti Azərbaycanın haqlı mövqeyini qəbul etməkdir. Belə bir vəziyyətdə Azərbaycanın bəzi müttəfiqləri İrana güzəştə getmək məsələsində e"htiyatlı davranmalıdırlar.
Müəllifin qəti inamına görə, güney azərbaycanlıları dəstəkləmək Tehranın ambisiyalarını məhdudlaşdırmaq üçün ən məqsədəuyğun strategiyadır. Belə ki, bu ölkədə əhalisinin sayı on milyonlarla ölçülən azərbaycanlılar molla rejimi üzərində əhəmiyyətli nəzarəti həyata keçirmək potensialına malikdirlər.
