Sülh formuluna dair növbəti görüş harada keçiriləcək? - "The Wall Street Journal" nəşri

Ukrayna Prezident Ofisinin rəhbəri Andriy Yermak avqustda Səudiyyə Ərəbistanında, Ciddə şəhərində Ukraynanın sülh yolu ilə nizamlanması üzrə beynəlxalq danışıqların aparılacağını və Rusiyanın bu danışıqlarda iştirak etməyəcəyini təsdiqləyib.

Ciddə görüşünə hazırlıq ərəfəsində bir sıra KİV yazıb, ilk məlumatı “The Wall Street Journal” dərc edib.

Yermak qarşıdan gələn danışıqları keçən ay Danimarkada baş tutan məsləhətləşmələrlə əlaqələndirib. Prezident Aparatı rəhbərinin sözlərinə görə, söhbət Ukraynanın ötən ilin sonunda təklif etdiyi sülh formulunun həyata keçirilməsinin mümkünlüyü ilə bağlı Kiyevin bir sıra ölkələrlə apardığı məsləhətləşmələrinin ikinci mərhələsindən gedir.

Yermakın sözlərinə görə, birinci mərhələdə Ukraynada akkreditə olunmuş səfirlərlə görüşlər olub. İkinci mərhələ milli təhlükəsizlik müşavirlərinin görüşləridir.

"Biz ilk belə görüşü danimarkalı həmkarlarla birgə təşkil etdik. Bu, iyun ayında Kopenhagendə baş tutdu. Növbəti görüş tezliklə baş tutacaq, ona Səudiyyənin paytaxt şəhəri ev sahibliyi edəcək", - Yermak bildirib.

Üçüncü mərhələ Ukraynanın “sülh formulu”nu dəstəkləyən dövlət başçılarının sammiti olmalıdır.

Ciddə toplantısının avqustun 5-6-da keçiriləcəyi bildirilib və görüşə 30-a yaxın ölkədən, o cümlədən Asiya, Afrika və Latın Amerikasının neytral ölkələri, o cümlədən İndoneziya, Braziliya və ola bilsin ki, Çindən nümayəndələr dəvət olunub.

Bundan əvvəl Rusiya Xarici İşlər Nazirliyi Danimarkadakı görüşü şərh edərkən Qərb ölkələrinin digər dövlətlərə onları Ukraynanı dəstəkləməyə inandırmaq üçün təzyiq göstərdiyini, lakin məqsədlərinə çatmadığını iddia etmişdi. Rəsmi olaraq görüşün yekunlarına dair heç bir sənəd dərc olunmayıb.

Sülh formulu prezident Vladimir Zelenskinin təklif etdiyi 10 bəndlik sülh planıdır. Orada xüsusi ilə qeyd olunur ki, istənilən danışıqlar yalnız ilhaq edilmiş Krım da daxil olmaqla, Rusiyanın işğal etdiyi bütün ərazilər qaytarıldıqdan və rus qoşunları işğal etdikləri bütün rayonlardan çıxarıldıqdan sonra başlaya bilər.

Yermak həmçinin bazar günü bildirib ki, Ukrayna gələn həftə təhlükəsizlik zəmanətləri ilə bağlı ABŞ ilə danışıqlara başlayacaq. Onun sözlərinə görə, bu zəmanətlər Ukrayna NATO-ya üzv olana qədər qüvvədə olacaq.