Rusiya KTMT missiyasının Ermənistana göndərilməsində israr edir - İrəvanın cavabı nə olacaq?

“Kollektiv Təhlükəsizlik Müqaviləsi Təşkilatı (KTMT) Ermənistanın sərhədyanı rayonlarında müşahidə missiyasının yerləşdirilməsi təklifi üzərində işi bərpa etməyə hazırdır”.

Bunu Rusiya Xarici İşlər Nazirliyinin MDB ölkələri üzrə birinci departamentinin direktoru Mikael Ağasandyan RİA Novosti-yə müsahibəsində deyib. O, belə bir şeyə əmin olduğunu bildirib ki, bu qərarın verilməsi regiondakı vəziyyətə müsbət təsir edəcək.

“Biz hələ də İrəvanın müsbət cavabını gözləyirik və Ermənistanın sərhədyanı rayonlarında KTMT-nin müşahidə missiyasının yerləşdirilməsi təklifi, habelə müttəfiqimizə kömək məqsədilə digər birgə tədbirlərlə bağlı əsaslı işi bərpa etməyə hazırıq. Müvafiq qərarların qəbulu regionun ümumi vəziyyətinə müsbət təsir göstərəcək. Bir daha vurğulayıram ki, biz belə quruculuq işlərinə hazırıq”, - deyə rəsmi bildirib.

Ermənistan dəfələrlə Kollektiv Təhlükəsizlik Müqaviləsinin təşkilindən narazılığını bildirib. İrəvan KTMT-dən Azərbaycanın 2022-ci ilin sentyabrında Ermənistan ərazilərinə nəzarəti ələ keçirməsini pisləməyi tələb edib. KTMT bu tələbi yerinə yetirməyib. Bu gərginlikdən sonra Ermənistan əvvəlcə KTMT-nin öz ərazisindəki təlimlərini ləğv edib, daha sonra qurumdakı baş katibin müavini kvotasından imtina edib.

KTMT bir neçə dəfə bəyan edib ki, Ermənistanın təhlükəsizliyinin təmin edilməsi maraqlarından çıxış edərək, Ermənistan-Azərbaycan sərhədinə hər zaman missiya göndərməyə hazırdır. Aprelin ortalarında rəsmi Moskva bir daha bəyan etdi ki, KTMT missiyasının Ermənistan-Azərbaycan sərhədinə göndərilməsi vaxtı İrəvandan asılıdır, top İrəvanın tərəfindədir.

İrəvan Moskvaya xarici işlər naziri səviyyəsində cavab verib, bildirib ki, Ermənistan sərhədində KTMT missiyasından imtina məsələsinin qaldırılması düzgün deyil, çünki Ermənistan missiyadan əl çəkməyib, layihə mövcuddur və bu istiqamətdə iş davam edir.