Heç kim, o cümlədən Ermənistan Arutunyanı əvəz edəcək şəxsi tanımaya bilər - Erməni politoloq

"Rusiya inteqrasiyanı başlatmağı, lakin başa çatdırmamağı təklif edir”

Qarabağdakı qondarma qurumun başçısı Araik Arutunyanın “prezident postu”ndan istefa verməsindən sonra separatçılar arasında və onların Ermənistanla münasibətlərində ziddiyyətlər daha da çoxalıb. Artıq Ermıənistandakı nisbətən sağlam qüvvələr bu gedişatın Qarabağdakı separatçı rejimin sonunu yaxınlaşdırdığını aydın görürlər.

“Araik Arutunyan gözəl başa düşür ki, “artsax”ı yaxın gələcəkdə nə gözləyir. Ona görə də istefa verdi”.

"Azsiyaset" azpolitika.info-a istinadla xəbər verir ki, bunu erməni politoloq Arqişti Kiviryan yerli mətbuata açıqlamasında deyib.

Erməni politoloq Arutunyan başda olmaqla, separatçıların liderlərinə sərt ittihamlar ünvanlayıb və onların şəxsi maraqları naminə hər şeyə getməyə hazır olduqlarını bildirib: “Əgər o, öz maliyyə vəziyyətini yaxşılaşdırmaq üçün vaxtı uzada bilsəydi, vəzifəsində qalardı. Ancaq o, bilir ki, yaxın zamanda nə baş verə bilər”.

Kiviryan hesab edir ki, Arutunyanın istefasından sonra separatçı qurumun rəhbərliyinin legitimlik problemi yaranıb: “Əgər o, məsuliyyətli adam olsaydı, bu addıma getməzdi. Ondan ötrü ki, legitimlik problemi yaranmasın. O, “dövlət naziri” yerinə real idarəçi təyin edə, özü isə nominal “prezident” olaraq qala bilərdi. Bu, həmin institutu saxlamağa kömək edərdi. İndi isə bu qərarın yeni problemlər yaratmayacağına təminat yoxdur. Arutunyan sonuncu “seçilmiş prezident” ola, yeni xadim (“dövlət naziri”) isə heç kim tərəfindən, o cümlədən də Ermənistan tərəfindən tanınmaya bilər”.

Arqişti Kiviryan

Politoloq xatırladıb ki, Arutunyanı “hakimiyyətə” əvvəlki “prezidentlər” gətirib: “Arutunyanı “hakimiyyətə” kim gətirib? “Artsax”ın keçmiş “prezidentləri”. Arutunyan kimi, yeni şəxs də böyük ehtimalla onların “məhsulu”dur. O, “hakimiyyəti” Bako Saakyanın arxasında durana təhvil verdi. Bu, o deməkdir ki, bu adamları “artsax”-ın taleyi maraqlandırmır, öz “hakimiyyəti” və mənfəəti maraqlandırır”.

Erməni politoloq Azərbaycanla danışıqlara gedərək, razılaşmalar əldə etməyə çağıran Samvel Babayanın mövqeyini müdafiə edərək, onun təkliflərinin dəstəklənməməsinin böyük səhv olduğunu qeyd edib: “Bu təkliflər rədd edildi, çünki onları məhz Samvel Babayan irəli sürmüşdü. “Artsax”dakı insanları yalnız şəxsi məsələləri düşündürür və ümumi maraqlar nəzərə alınmadan çalışılır ki, Babayanın təklifləri qəbul olunmasın. Eyni zamanda, tərəzinin digər gözündə heç bir təklif yoxdur”.

Kiviryan hesab edir ki, Arutunyan “vəzifəsində” qalmalı, Babayan isə “dövlət naziri” təyin edilməli idi: “Babayan təsadüfi adam deyil. O, 100 gün vaxt istəmişdi. Ondan sonra neçə 100 gün keçib? Ona bu imkanı vermədilər, çünki onları “artsax”-ın taleyi maraqlandırmır”.

Politoloq deyib ki, Paşinyanın adamı hesab olunan Babayan Azərbaycanla inteqrasiyaya başlamağın tərəfdarı olsa da, bu, hələ həmin prosesin başa çatdırılacağı anlamını daşımır: “Arutunyan eyham vurdu ki, Azərbaycanın tələbilə istefa verib. Hətta onun dediyi kimidirsə də belə, bunu nümayişkaranə şəkildə qəbul etmək olmazdı. Qarabağda kövrək sülhün yeganə təminatçısı olan Rusiya inteqrasiyanı başlatmağı, lakin başa çatdırmamağı təklif edir. Babayan məgər bu məntiqdən kənar nəsə deyir? İndiki vəziyətdə isə hər şeyi o vəziyyətə çatdıracaqlar ki, “artsax” olduqca ağır durumda qalacaq”.

Beləliklə, separatçıların ətrafında halqa daraldıqca, “çapalamalar” artır və bu aqoniyanın qondarma separatçı qurumun məhvi ilə yekunlaşması prosesi sürətlənir. Erməni politoloqun işlətdiyi “Rusiya inteqrasiyanı başlatmağı, lakin başa çatdırmamağı təklif edir” fikri isə olduqca maraqlıdır və bu, bir daha Rusiyanın vaxt qazanmaq, regionda qalmaq üçün necə riyakar və çirkin oyunlar apardığını isbat edir.