Rusiya Bakının işğal edilmiş Ukrayna ərazilərini Rusiyanın tərkibində tanımaqdan imtina etməsindən narazıdır
Rusiya Azərbaycan XİN-in Ukraynanın Rusiya tərəfindən işğal olunmuş regionlarında seçkiləri tanımamaq haqqında bəyanatı ilə əlaqədar ölkəyə "diplomatik narazılıq" bildirib.
RF XİN-in nümayəndəsi Mariya Zaxarovanın brifinqdə belə deyib: "Bu qiymətləndirmələri qəbul edə bilmərik, bu, qəbuledilməzi qiymətləndirmələrdir və ölkələrimiz arasında müttəfiqlik səviyyəsində olan münasibətlərə uyğun deyil. Buna görə Azərbaycan tərəfinə diplomatik xətlə narazılıq bildirilib. Biz bununla bağlı bütün fikirlərimizi bildirdik".
"Biz Bakının ölkəmizin ərazi bütövlüyü məsələlərinə bizim tərəfdaşlarımızın Azərbaycan Respublikasının ərazi bütövlüyündən söhbət gedərkən arxayın olduqları hörmətlə yanaşmalı olduğunu düşünürük", deyə o qeyde dib.
Xatırladaq ki, sentyabrın 9-da Azərbaycan XİN öz Tvitter hesabında Ukraynanın ayrı-ayrı ərazilərində "Saxta seçkilər" haqqında bəyanat yayıb.
"Azərbaycan və Ukrayna bir-birinin suverenliyini və ərazi bütövlüyünü tanıyır və dəstəkləyir. Bundan irəli gələrək, Azərbaycan Ukrayna ərazisində bu dövlətin Konstitusiyasına və qanunvericiliyinə uyğun şəkildə keçirilən istənilən seçkinin legitim ola biləcəyini bəyan edir.
Azərbaycanın bu prinsipial mövqeyi beynəlxalq hüququn dövlətlərin suverenliyinə aid olan hüquqlara hörmətlə bağlı universal şəkildə tanınmış norma və prinsiplərinə əsaslanır.
Bu meyarlara cavab vermədiyi üçün, Ukraynanın beynəlxalq səviyyədə tanınmış ərazilərinin bir hissəsində keçirilən son "seçkilər"in, ümumiyyətlə, heç bir qanuni qüvvəsi yoxdur", deyə bəyanatda bildirilirdi.
