"Netanyahu hücuma hazır deyildi..." - Tramp İsrailin Baş nazirini tənqid etdi
“O, hazır deyildi. İsrail hazır deyildi. Trampın dövründə hazır olmağa heç ehtiyac da yox idi”.
Bunu ABŞ-nin sabiq prezidenti, hazırda isə Respublikaçılar partiyasının namizədləri arasında favorit sayılan Donald Tramp Fox News-a açıqlamasında deyib.
Tramp bildirib ki, Netanyahu bu hücumdan ağır zərbə alıb. Onun fikrincə, HƏMAS-ın hücum hazırlığının nəzərdən qaçırılması Netanyahu hökumətinin və xüsusi xidmət orqanlarının ağlagəlməz səhvidir: “Kim düşünərdi ki, onların(İsrailin) kəşfiyyatı bunu qeydə almaya bilər? Bu aksiyada minlərlə insan iştirak edib. Minlərlə insan bunu bilirmiş... Bu, nə Netanyahu, nə də başqa kim üçünsə yaxşı deyil”.
Tramp xatırladıb ki, ABŞ İran generalı Qasim Süleymanini məhv edəndə İsrail bu əməliyyatda iştirak etməmişdi. Netanyahunu buna görə tənqid edən Tramp bildirib ki, həmin vaxt Baş nazir ABŞ-ı pis vəziyyətdə qoyub bu vəziyyətdən xeyir götürməyə çalışıb. Sabiq prezident əlavə edib ki, İsrail faktiki olaraq İranla savaşır və bunu nəzərə almalıdır.
