"Bu baş verməyənədək ABŞ-Azərbaycan münasibətləri normallaşmayacaq" - ABŞ dövlət katibinin köməkçisi
“Birləşmiş Ştatlar Azərbaycana hərbi və digər yardımları dayandırdı, bəzi yüksək səviyyəli səfərləri ləğv etdi və Vaşinqton Bakıya işarə etdi ki, Ermənistanla sülh danışıqlarında irəliləyiş əldə olunmayınca ikitərəfli münasibətlər normallaşmayacaq”.
ABŞ dövlət katibinin Avropa və Avrasiya məsələləri üzrə köməkçisi Ceyms Obrayen bunu ABŞ Konqresinin Nümayəndələr Palatasının Xarici Əlaqələr Komitəsində Dağlıq Qarabağdakı vəziyyətlə bağlı dinləmələrdə çıxışı zamanı deyib.
“Biz açıq şəkildə bildirdik ki, 19 sentyabr hadisələrindən sonra sülh yolunda irəliləyiş görməyincə Azərbaycanla bağlı heç nə normal olmayacaq. Beləliklə, biz bir sıra yüksək səviyyəli səfərləri ləğv etdik, (Bakının) hərəkətlərini pislədik və vəziyyətin həqiqi yaxşılaşmasını görənə qədər imtina bildirişi (ABŞ-nin Azərbaycana birbaşa yardımlarını qadağan edən 907 saylı düzəlişdən imtina – red.) verəcəyimizi gözləmirik”, - o bildirib.
Obrayen etiraf edib ki, Azərbaycan ABŞ-nin diqqətinə Ermənistana güc tətbiq etmək kimi planlarının olmadığı barədə məlumat çatdırıb.
“Bakıdakı hakimiyyət bizi əmin etdi ki, onların belə bir niyyəti yoxdur. Biz qoşunların hərəkətini və onların başqa planlarının ola biləcəyinə dair hər hansı əlaməti diqqətlə izləyirik. Qeyd etdiyim kimi, biz onlara dedik ki, sülh sazişi yarımçıq qaldığı halda, prosesin həmişəki vəziyyətinə qayıtmaq şansı yoxdur”.
ABŞ dövlət katibinin köməkçisi bildirib ki, yaxın bir neçə həftə Ermənistan və Azərbaycan arasında sülh sazişinin bağlanması prosesi üçün həlledici olacaq:
“Növbəti bir neçə həftə tərəflərin niyyətlərdən razılığa keçməyə hazır olub-olmadığını yoxlamaq üçün həlledici olacaq. Çünki bildiyimiz kimi, danışıqlarda “bəli” alınacaq ən çətin cavabdır”.
