Azərbaycanda hər il minlərlə ton ərzaq itkiyə gedir
Azərbaycanda daxili tələbatı qarşılamaq üçün əksər növ heyvandarlıq məhsulları xaricdən idxal edilir.
Heyvandarlıq məhsulları ilə yanaşı bitkiçilik məhsullarından olan düyü və kartof kimi əsas növ ərzaq məhsullarına olan tələbatı da yerli istehsal hesabına təmin edə bilmirik.
Bunlardan başqa sənaye emalından keçmiş əsas növ ərzaq məhsulları ilə özünütəminetmə səviyyəsində də idxaldan asılılıq yüksəkdir.
Onu da bildirək ki, qeyd olunan məhsullar üzrə özünütəminetmə səviyyəsinin aşağı olmasına baxmayaraq, hər il böyük miqdarda itkilər olur.
İtkilər əsasən məhsulun istehsalı, daşınması və saxlanılması zamanı baş verir.
Məsələn, Azərbaycanın kartofa olan tələbatının 89%-i daxili istehsal hesabına təmin olunur. Bu səbəbdən hər il xaricdən böyük həcmdə kartof idxal olunur. Kartofa olan tələbatı daxili istehsal hesabına təmin edə bilmədiyimiz halda, hər il minlərlə ton kartof itkiyə gedir. 2022-ci ildə Azərbaycan əhalisi 922 min ton kartof istehlak edib. Yerli istehsal kifayət etmədiyi üçün xaricdən kartof idxal edilib. Lakin, eyni zamanda il ərzində 67 min 594 ton kartof itkiyə gedib. Rəqəmlərdən də göründüyü kimi, itkiyə gedən kartof ümumi istehlakın 7%-dən çox olub.
Aşağıdakı cədvəldə əsas ərzaq məhsulları üzrə özünütəminetmə səviyyəsi və itkilərin miqdarı qeyd olunub:
