2024-də manat dollar qarşısında ucuzlaşa bilər?
Ötən il manat dollar və digər xarici valyutalar qarşısında öz iqtisadi stabilliyini qoruyub saxladı. Başlıca olaraq ölkə daxilində infiliyasiyanın kəskin dərəcədə güclü olmaması və devalivasiya prosesinin baş verməməsi manatın başqa valyutalar qarşısında sabit qalmasını təmin etdi.
Bir çox iqtisadçılar dünyada baş verən iqtisadi və siyasi proseslər, o cümlədən, müxtəlif qaynar nöqtələrdə davam edən silahlı münaqişələr səbəbindən 2024-cü ildə neftin ixracında və satış qiymətində kəskin azalma və ucuzlaşmanın özünü göstərəcəyini proqnozlaşdırır. Bəs görəsən ixrac gəlirlərinin böyük hissəsini neft və qaz satışından təmin edən Azərbaycanda sözegedən proqnozlardan asılı olaraq manatın dollar və digər valyutalar qarşısında ucuzlaşması gözlənilirmi?
Mövzu ilə bağlı danışan iqtisadçı-ekspert Natiq Cəfərli Azərbaycanda manatın dollar və digər valyutalar qarşısında məzənnəsinin inzibati qaydada tənzimləndiyini və ucuzlaşmanın Nazirlər Kabineti və Mərkəzi Bankın qərarından asılı olaraq baş verə biləcəyini bildirib.
“Azərbaycanda manatın məzənnəsi inzibati qaydada tənzimlənir. Mərkəzi Bank 2016-cı ildə üzən məzənnə rejiminə keçiləcəyini bəyan etsə də, bu baş tutmadı. İndiki iqtisadi sistemdə bu rejimin tətbiqi mümkün deyil.
Manatın dollar və digər xarici valyutalar qarşısında ucuzlaşması və ya əksinə, bahalaşması ilə bağlı qərarı Nazirlər Kabineti və hökumət Mərkəzi Bankla birgə verə bilər.
Düzdü, manat neftdən birbaşa olaraq asılıdır. Hətta obrazlı dillə desək, manat neftin kağız formasıdır. Təbii ki, neftin hasilatının azalması və qiymətinin düşməsi ümumi fonda ölkə iqtisadiyyatına öz təsirini göstərir.
Ancaq bu il manatın dollar qarşısında ucuzlaşması ilə bağlı verilən proqnozlar real görünmür. Çünki bütün iqtisadi parametrlər, büdcə, xərcləmələr və gəlirlər 1 manat 70 qəpiklə hesablanıb. Həm də bu il bildiyiniz kimi, seçkilər ilidir. İl ərzində həm prezident, həm də parlament seçkiləri olacaq. Məzənnədə dəyişikliyə gedib manatı ucuzlaşdırmaq aydındır ki, kifayət qədər ciddi infiliyasiya və qiymət artımına səbəb olacaq addımdır. Seçki dönəmində manatla bağlı belə bir addımın atılacağı inandırıcı görünmür”(yenisabah.az).
