Ermənistanla Avropa İttifaqının əməkdaşlığına dair yeni sənəd hazırlanır
"Ermənistan Avropa İttifaqı ilə əməkdaşlığa dair yeni sənəd hazırlayır, onun iyul ayına qədər imzalanması planlaşdırılır".
"Armenpress" xəbər verir ki, bu barədə parlamentin Avropaya inteqrasiya üzrə daimi komissiyasının iclasında Ermənistan xarici işlər nazirinin müavini Paruyr Hovhannisyan bildirib.
“Ermənistan-Aİ Hərtərəfli və Genişləndirilmiş Tərəfdaşlıq Sazişinin tam yerinə yetirilməsi halında, biz həqiqətən də Aİ üzvlüyünə hazır namizəd ölkə statusuna malik olacağıq. Eyni zamanda, ötən ilin noyabrında baş tutan faktaraşdırıcı missiyanın nəticəsi olaraq ortaya çıxan yeni əməkdaşlıq istiqamətləri və yeni proqramlar hazırlanır. İndi bu iki proses və siyasi yaxınlaşmamızın ifadəsi ilə yanaşı, yeni sənəd hazırlanır. Ermənistan-Avropa İttifaqı Tərəfdaşlıq Şurasında və digər iş səviyyələrində onunla bağlı bəzi məsələlər müzakirə olunub. Biz may ayında yeni layihəni alacağımızı gözləyirik, o, yəqin ki, iyul ayına kimi qəbul olunacaq”, - Hovhannisyan bildirib.
