"Hələ uzun müddət Ukraynaya silah verməli olacağıq" - Qərb müharibənin davam etməsində maraqlıdır

Almaniya kansleri Olaf Şolts Ukraynada uzunmüddətli müharibə gözləyir.

Kansler "Wochentaz"a müsahibəsində "Ukraynanı uzun müddət silah və sursatla təmin etməli olacağıq", -deyə bildirib.

Şolts hazırda Rusiya Prezidenti Vladimir Putinlə birbaşa danışıqları məqsədəuyğun hesab etmədiyini deyib: “Belə danışıqlar yalnız onların nəticə verəcəyinə dair hiss olduqda ağlabatandır. Ancaq Rusiyanın indi müharibə aparması bunun əksini göstərir. Danışıqlar o zaman məqsədəuyğun olacaq ki, Rusiya onun diqtəsi ilə sülh olmayacağını anlasın və Putin anlasın ki, o, müharibəni dayandırmalı və qoşunlarını çıxarmalıdır”.

Kansler keçmişdə Putinlə danışıqlar apardığını, bunun da tənqidlərə səbəb olduğunu xatırladıb. Ancaq gələcəkdə Rusiya lideri ilə danışıqları istisna etməyib. Şoltsun sözlərinə görə, o, Putinlə sonuncu dəfə 2022-ci ilin dekabrında danışıb.

Şolts deyib ki, o, "Ukraynaya güclü dəstəyi Rusiya ilə NATO arasında müharibəyə gətirib çıxaracaq eskalasiyanın qarşısını alan siyasətlə birləşdirən" kursun tərəfdarıdır. Kansler bir daha əmin edib ki, Almaniya lazım olduğu müddətdə Ukraynanı dəstəkləyəcək.

Qeyd edək ki, aprelin 13-də Şolts Çinə üç günlük səfərə yola düşür və burada özünün dediyi kimi, Pekin rəhbərliyini Rusiyaya təsirindən istifadə edərək onu müharibəni dayandırmağa məcbur etməyə çağıracaq.