Diaspor Komitəsi heç bir konsepsiya ilə çıxış edə bilmir
Xaricdən qaynaqlanan bütün ideoloji tezislər ölkəmizdə çox rahat şəkildə ictimai şüura nüfuz edə bilir və intellektual cameənin menyusuna daxil olaraq müzakirə olunur. Qarabağı hansı ideologiya azad etmişdik, bu barədə düşünə bilmədik. Bu ideologiya yox idisə, bəlkə suverenliyi bərpa olunan ölkə yeni ideologiyaya sahib olmalı idi? Bu şansı da itirməkdəyik. Ölkədə bütün fəaliyyət prinsipləri inzibatçılığa söykənib, ideologiya kapitalizmə uduzub, bütün dəyərlər və hesabatlar statistikaya əsaslanır. Qalib xalq ideoloji cəhətdən tərkislah edilmiş durumdadır. Rusiya, Türkiyə, İsrail, ABŞ, İran və hətta Səudiyyə Ərəbistanı Azərbaycanda rahat şəkildə istədiyi ideoloji baza formalaşdırıb. Əl açıb kənardan ümid dilənirik, ideologiya umuruq, yamaq olmağa çalışırıq. Vətən tikanlı məftillərin olduğu yerdən - sərhəddən başlamır axı.
Bir nüçə gündür xaricdə yaşayan azərbaycanlılarla bağlı və diaspor təşkilatlarımızın fəaliyyəti barədə aldığım məlumatlar xarici ölkələrdə də vəziyyətimizin çox pis olduğunu və soydaşlarımızı bir yumruq halında birləşdirəcək ideologiyanın olmadığını deməyə əsas verir.
Bu məsələyə qısa şəkildə toxunacam. Güclü diaspor təkilatları formalaşdıra bilərikmi? Xeyr, bu, həlki mümkünsüzdür. Səbəbləri çox sadədir.
Əvvəla, ona görə ki, insanlar ağır sosial şərtlərdən, işsizlikdən canlarını qurtarmaq üçün ölkəni tərk ediblər, burada bütün mümkün travmalar alan bu şəxslər xarici ölkələrdə rahat yaşamaq niyyətindədirlər, özlərini-ailələrini xilas etmək barədə düşünürlər.
İkincisi, xaricə köç edən soydaşlarımız özləri ilə heç bir ideologiya aparmayıblar. Öz ölkəsində tərksilah edilmiş şəxs xarici ölkələrə üz tutandan sonra kənar tezislərin təsiri altına düşür.
Üçüncüsü, diaspor quruculuğuna məsul olan Diasporla İş Üzrə Dövlət Komitəsi bu günə qədər soydaşlarımızı bir yumruq halında birləşdirəcək heç bir ideoloji kopnsepsiya təklif etməyib, nə də bu barədə düşünə bilir.
Müxtəlif ölkələrdə keçirilən ənənəvi tədbirlər, təqdim olunan statistik hesabatlar, paylaşılan fotolar, paylanan medallar baş aldatmaqdan başqa bir şey deyil. Hər kəsin başı pul qazanmağa, tenderlərə, layihələrə ayrılan pullardan faydalanmağa qarışıb. Diaspor sahəsində ədalətsizlik o həddə çatıb ki, ömrünü, var-dövlətini bu yolda xərcləyən insanlar bütün proseslərdən çıxdaş olunub, mütərrəqi gəncləri isə adam yerinə qoyan yoxdur. Xaricdə yaşayan soydaşlarımız bir tərəfə qalsın, bu qurum hələ indiyə qədər daxildə - cəmiyyətimizə hansı işlə məşğul olduğunu əxz etdirə bilməyib. Heç kəs heç nə anlamır, başa düşmür.
Cənablar, müharibə sərhəddə bitib, amma ideoloji müharibə daha şiddətlə davam etməkdədir.
Müəllif: Samir Feyruzov
