Ermənistan Zəngəzur dəhlizindən 1 milyard qazanacaq?
“Ermənistan təkcə Türkiyə yox, Azərbaycanla da kommunikasiyaların açılmasında maraqlıdır. Hələlik İrana görə Zəngəzur dəhlizinin açılacağını bəyan etmirlər. Amma bunu istəyirlər. Çünki bu, Ermənistana böyük gəlirlər qazandıracaq. Kommunikasiyalar açılsa, Ermənistan təkcə bundan ildə 1 milyard dollar civarında qazanc əldə edəcək. Bu, Ermənistan üçün böyük rəqəmdir. Onun buna ehtiyacı var. İran isə bunu istəmir. İrəvanda da başa düşürlər ki, İran öz iqtisadi maraqlarına görə Ermənistan-Azərbaycan münasibətlərinin düzəlməsini istəmir”.
Bunu politoloq Cümşüd Nuriyev bildirib.
Onun dediyinə görə, bölgədə sabitliyin təmin edilməsi Azərbaycan-Ermənistan sülh müqaviləsinin imzalanmasından asılıdır. Sülh müqaviləsi imzalansa, sabitlik də olacaq:
“ABŞ qəti şəkildə Cənubi Qafqazda Rusiyanın maraqlarına uyğun düzənin formalaşmasına razı deyil. Buna görə də çalışırlar ki, sülh müqaviləsinin başlanmasında Rusiyanın rolu olmasın, bu məsələ daha çox Türkiyə və ABŞ-la əlaqələndirilsin. Ona görə də ABŞ bu məsələdə Türkiyə ilə birgə fəaliyyəti üstün tutur”(bakupost.az).
