Türkiyədə XİN rəhbərlərinin "3+3" formatında görüşü keçiriləcək

Yaxın vaxtlarda Türkiyədə xarici işlər nazirlərinin “3+3” formatında növbəti görüşü keçiriləcək.

Bu barədə İranın Ermənistandakı səfiri Mehdi Sobhani SNN agentliyinə bildirib.

O, platformada iştirak edən xarici işlər nazirlərinin sonuncu iclasının Tehranda keçirildiyini xatırladıb.

Diplomat Ermənistanın Sünik bölgəsinin təhlükəsizliyinin İran tərəfi üçün vacibliyini də qeyd edib. “Bu, İran və Ermənistan arasında təhlükəsizliyin və ticarətin təmin edilməsində mühüm rol oynayan strateji regiondur. İranın Qafan şəhərində baş konsulluğunun açılması sərhəd kommunikasiyalarının yaxşılaşmasına töhfə verib”.

Xatırladaq ki, “3+3” qrupunun (əslində, Gürcüstan hələ də platformanın işində iştirak etmədiyi üçün “beşlik”) ilk iclası 2021-ci ilin dekabrında Moskvada beş ölkənin - Ermənistan, Rusiya, İran, Azərbaycan və Türkiyənin xarici işlər nazirlərinin müavinləri səviyyəsində keçirilib. Beş ölkənin xarici işlər nazirlərinin iştirakı ilə daha bir görüş 2023-cü ilin oktyabrında İranda keçirilib.
Növbəti görüşün 2024-cü ildə Türkiyədə baş tutacağı gözlənilir.