13 uşaq atası Haniyə kimdir? - HƏMAS lideri ilə bağlı maraqlı faktlar
Uzun müddətdir Fələstinə və HƏMAS-a qarşı hücumlarını davam etdirən İsrail bu dəfə HƏMAS lideri Haniyəni hədəf aldı.
Haniyə Tehrandakı hücumda həyatını itirdi. HƏMAS Siyasi Bürosunun rəhbəri İsmayıl Haniyənin İranın paytaxtı Tehrandakı iqamətgahına İsrail ordusunun hava zərbəsi nəticəsində öldürüldüyü təsdiqlənib.
Bəs İsmayıl Haniyə kimdir?
"Azsiyaset" "bakupost.az"-a istinadla onun bioqrafiyasi ilə bağlı önəmli məlumatları təqdim edir:
Fələstinli siyasətçi və Fələstin Milli Administrasiyasının mübahisəli keçmiş baş naziri İsmayıl Haniyə 1963-cü ildə Qəzza zolağındakı Elşati qaçqın düşərgəsində anadan olub. Ailəsi 1948-ci ildə Ərəb-İsrail müharibəsi zamanı Aşkelon şəhərindən qaçaraq qaçqın vəziyyətinə düşüb. 1987-ci ildə Qəzza İslam Universitetini bitirib. 1989-cu ildə Birinci İntifadada (İsrailə qarşı üsyan) iştirak etdiyi və HƏMAS üzvü olduğu səbəbilə həbs edilib. 1992-ci ildə azadlığa çıxdıqdan sonra o, İsrail tərəfindən Cənubi Livana deportasiya edilib və 415 digər "İslami Cihad" və HƏMAS üzvlərindən ibarət qrupa qoşulub. Növbəti il o, Qəzzaya qayıdıb.
1999-2004-cü illərdə o, HƏMAS-ın baş katibi Şeyx Əhməd Yasinin aparat rəhbəri vəzifəsində çalışıb.
2005-ci ilin dekabrında keçirilən və 25 yanvar 2006-cı ildə təkrarlanan Fələstin Qanunvericilik Şurasına seçkilərdə Həmas lideri Xalid Məşəl Dəməşqdəki sürgündə olduğu üçün siyahının başında idi. HƏMAS-ın 132 yerdən 74-nü qazandığı seçkilər nəticəsində 16 fevral 2006-cı ildə Haniyə HƏMAS-ın baş nazirliyə namizədi elan edilib.
Fevralın 19-da o, ABŞ və İsrailin müqavimətinə baxmayaraq, Fələstin prezidenti Mahmud Abbas tərəfindən baş nazir təyin edilib.
O, 2006-cı ilin oktyabrında Qəzzada Fəth və HƏMAS üzvləri arasında toqquşma zamanı karvanına hücumdan sağ çıxıb.
O, 2007-ci ilin mayında İsrailin evinə raket hücumundan da qurtulub.
2007-ci ilin iyununda Qəzza zolağında HƏMAS və Fəth arasında münaqişə pik həddə çatdıqda, o, Fələstin prezidenti Mahmud Abbas tərəfindən tutduğu vəzifədən uzaqlaşdırılıb.
Haniyə evli olub, 13 övladı var. O, 2017-ci ildən HƏMAS-ın Siyasi Bürosunun rəhbəri idi.
