Azərbaycanın mina problemi BMT-nin Cenevrə ofisində müzakirəyə çıxarılır
Oktyabr ayının 31-də Beynəlxalq Avrasiya Mətbuat Fondu (BAMF) BMT-nin Cenevrə ofisində “İnkişaf naminə minatəmizləmə” adlı tədbir keçirəcək.
Bu barədə BAMF prezidenti Umud Rəhimoğluna istinadən xəbər verir.
Tədbir BAMF-ın Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin dəstəyi ilə həyata keçirdiyi "Minasız dünya təşəbbüsü - BMT-nin Dayanıqlı İnkişaf Məqsədlərinin 18-ci məqsədi kimi" adlı layihə çərçivəsində BMT-nin İnsan Hüquqları üzrə Ali Komissarlığın İdarəsinin (OHCHR) 2024-cü il Sosial Forumu daxilində keçiriləcək. BAMF prezidenti Umud Mirzəyev tədbirin təşkilatçıları və müzakirə olunacaq məsələlərdən danışıb:
“BAMF ilə yanaşı “Sülhün kökləri” (Roots of Peace)” və Beynəlxalq Hüquq və İnkişaf İnstitutu (IRDG) təşkilatlarının ev sahibliyi ilə baş tutacaq tədbirdə minaların və Müharibənin Partlamamış Qalıqlarının (MPQ) səbəb olduğu qlobal böhranın həlli üzrə məsələlər, mina probleminin 18-ci DİM kimi qəbul edilməsi təşəbbüsü və minaların insan hüquqlarına və insanların sosial-iqtisadi həyatına təsirindən danışılacaq.
Azərbaycan Respublikası Minatəmizləmə Agentliyinin (ANAMA) nümayəndəsinin də iştirak edəcəyi müzakirələrdə BMT agentliklərinin, minaların, silahların, nüvə silahlarının qadağan olunması üzrə beynəlxalq kampaniyaların, mina aksiyası və insan hüquqlarının qorunması çərçivəsində çoxillik təcrübəyə malik dünyanın aparıcı təşkilatlarının nümayəndələri təmsil olunacaq.”
Qeyd edək ki, layihənin əsas məqsədi minaların insan sağlamlığına və təbiətə vurduğu ziyanlara, xüsusən qlobal sülh və inkişaf üçün yaratdığı maneələrə dair unikal çağırışlara və BMT-nin 18-ci Dayanıqlı İnkişaf Məqsədi (SDG/DİM) kimi mina probleminin müəyyən edilməsi təşəbbüsünə dəstək verməkdir.
