Yun Sok-yol həbsxanada olsa da, prezident olaraq qalır - Qiyam ittihamı

Cənubi Koreya prokurorları prezident Yun Sok-yolu rəsmi olaraq üsyana rəhbərlik etməkdə ittiham edib. O, ölkə tarixində həbs olunan və cinayət işi ilə üzləşən ilk dövlət başçısıdır.

Bu barədə məlumatı yerli “Yonhap” agentliyi yayıb. Nəşr xəbər verir ki, Sok-yol keçmiş müdafiə naziri Kim Yong-hyun və başqaları ilə birlikdə hər hansı müharibə, silahlı münaqişə və ya milli böhran əlamətlərinin olmadığı bir şəraitdə hərbi vəziyyət tətbiq etməklə dövlət əleyhinə cinayətə qol qoyub.

Prokurorlar deyirlər ki, Sok-yol parlamentə hərbi qüvvələr göndərib ki, qanunvericilər onun elan etdiyi hərbi vəziyyətə qarşı səs verməsinlər.

Bundan əlavə, prezident, ittiham tərəfinin fikrincə, əsas siyasi fiqurların, o cümlədən parlamentin spikeri, müxalifət partiyalarının rəhbərləri və seçkilərə nəzarət orqanının rəsmilərinin həbsini planlaşdırıb.

Qeyd edək ki, ona qədər Yun Sok-yol vəzifə səlahiyyətlərindən sui-istifadədə şübhəli bilinirdi, lakin bu ittihamlar ləğv edilib, çünki qanun vəzifədə olan prezidentə başqa cinayət ittihamlarından toxunulmazlıq verir. “Yonhap” qeyd edir ki, Cənubi Koreyada üsyan ömürlük həbs və ya ölümlə cəzalandırılır, lakin ölkədə bir neçə onilliklər ərzində edamlar həyata keçirilmir.

Prezidentin vəkilləri ittiham tərəfini tənqid edir, bildirirlər ki, prezidentin hərbi vəziyyət elan etməsi müxalifətin nəzarətdən çıxması nəticəsində yaranan milli böhran səbəbindən ictimaiyyət üçün ümidsiz bir müraciət olub.

Yun Sok-yol yanvarın 15-dən həbsdədir. Müstəntiqlər onu yalnız ikinci cəhddə saxlaya biliblər.

Prezident dekabrın 3-də Cənubi Koreyada hərbi vəziyyət elan edib. O, bunu konstitusiya quruluşunu “kommunist qüvvələrdən” qorumaq zərurəti ilə izah edib. Onun sözlərinə görə, müxalifətin hərəkətləri səbəbindən bu tədbirə əl atıb.

Elə həmin gecə parlament prezident fərmanının ləğvinə səs verib, bundan sonra Yun Sok-yol onu ləğv etməyə razı olub. Növbəti bir neçə gün ərzində prezident və bir sıra digər məmurlara qarşı istintaq başladılıb.

Dekabrın 14-də Cənubi Koreya parlamenti ikinci cəhddə prezidentin impiçmentini dəstəkləyib və onun səlahiyyətləri dayandırılıb. İş Konstitusiya Məhkəməsinə göndərilib və o, 180 gün ərzində prezidentin vəzifəsindən kənarlaşdırılması və ya bərpası barədə qərar qəbul etməlidir. Məhkəmə qərar verənə qədər Yun Sok-yol rəsmən prezident olaraq qalır. O, vəzifədən uzaqlaşdırılarsa, ölkədə 60 gün ərzində prezident seçkiləri keçirilməlidir.