Putin Trampın "Sülh Planı"na münasibət bidirdi
Rusiya Prezidenti Vladimir Putin ABŞ administrasiyasının hazırladığı və Donald Tramp tərəfindən dəstəklənən sülh planını ilk dəfə şərh edib. O, noyabrın 21-də Təhlükəsizlik Şurasının iclasında çıxış edərək bildirib ki, Vaşinqtonun təqdim etdiyi sənəd Rusiya-Ukrayna müharibəsinin siyasi yolla həlli üçün əsas ola bilər.
Putinin sözlərinə görə, Moskva planın mətni ilə tanış olub, lakin təkliflər üzrə ətraflı müzakirə aparılmayıb. Buna səbəb kimi Ukraynanın hələlik sənədə razılıq verməməsi göstərilib.
Rusiya lideri qeyd edib ki, sözügedən plan onun ABŞ Prezidenti Donald Tramp ilə Alyaskada keçirdiyi görüş zamanı müzakirə olunan razılaşmanın “modernləşdirilmiş versiyasıdır”.
Putin iddia edib ki, həmin vaxt Moskva təkliflərlə razılaşmışdı, lakin görüşdən sonra proses ABŞ tərəfindən “Ukraynanın etirazı səbəbilə” dayandırılıb. O həmçinin açıqlayıb ki, Vaşinqton Moskvanın “müəyyən kompromislərə” getməsini istəyib.
Putin bildirib ki, Rusiya danışıqlara hazırdır, amma cəbhədəki mövcud vəziyyət – xüsusilə Kupyansk və digər istiqamətlərdəki dinamika Kreml üçün “tam məqbuldur”. O, noyabrın 4-də Kupyanskin “demək olar tam” Rusiya ordusunun nəzarətində olduğunu deyib. Bununla belə, açıq mənbələrdə Kupyansk ətrafında cəbhə xəttinin dəyişmədiyi, əsas irəliləyişlərin isə daha çox Pokrovsk istiqamətində qeydə alındığı bildirilir. Ukrayna tərəfi şəhəri tərk etmə barədə məlumat verməyib.
“Bloomberg”-in məlumatına görə, ABŞ planının əsas müddəaları Avropada ciddi narazılıq yaradıb. Aİ və Böyük Britaniya liderləri Ukrayna Silahlı Qüvvələrinin suverenliyini müdafiə imkanlarının saxlanmasını zəruri hesab edirlər. Onlar həmçinin hesab edir ki, mümkün danışıqlar yalnız mövcud təmas xətti əsasında aparıla bilər.
“Axios”-un dərc etdiyi ilkin mətnə əsasən, ABŞ planı Ukraynanın hazırda nəzarətində olan Donetsk bölgəsinin bir hissəsindən çıxmasını və həmin ərazinin beynəlxalq səviyyədə Rusiya Federasiyasına məxsus sayılan, lakin rus qoşunlarının daxil olmayacağı demilitarizə olunmuş neytral zona elan edilməsini nəzərdə tutur.
