Zalujnı Kiyevə qayıdır...

Ukrayna Silahlı Qüvvələrinin keçmiş baş komandanı və Ukraynanın Böyük Britaniyadakı hazırkı səfiri Valeri Zalujnı tezliklə diplomatik vəzifəsindən ayrıla bilər. 

“Azsiyaset” xəbər verir ki, bu barədə “Radio NV” siyasi və diplomatik dairələrdəki mənbələrə istinadla məlumat yayıb.

Ukrayna Prezident Ofisinə yaxın mənbələr iddia edir ki, Zalujnı bir neçə həftə əvvəl Kiyevə səfəri zamanı Volodimir Zelenskiyə istefa vermək niyyəti barədə məlumat verib. Mənbə iddia edir ki, Zalujnıya Zelenski tərəfindən baş nazir və Prezident Ofisi rəhbəri də daxil olmaqla, müxtəlif yüksək vəzifələr təklif olunub. Lakin o bunların heç birinə maraq göstərməyib.

Digər mənbələr NV-yə bildiriblər ki, keçmiş baş komandan əvvəllər Ukraynanın ABŞ-dəkı səfiri və ya Ukrayna Silahlı Qüvvələrinin Baş Komandanı vəzifəsinə qayıtmağı nəzərdən keçirib. Lakin hələlik bununla bağlı yekun qərar qəbul edilməyib.

Məlumatda deyilir ki, Zalujnı Kiyevə qayıtmağı planlaşdırır və vəziyyət dəyişməsə, növbəti addımlarını gələn ilin 4-5 yanvar tarixlərində açıqlaya bilər.

Xatırladaq ki, Zalujnı 2024-cü ilin iyul ayından bəri Ukraynanın Birləşmiş Krallıqdakı səfiri vəzifəsində çalışır.