"İran atəşkəsə razı deyil, amma..." - Əraqçi sülh şərtlərini açıqladı

Tehran vasitəçi ölkələrin müharibəni dayandırmaq üçün təkliflərini dinləməyə hazırdır, əgər bu təkliflərə İrana vurulan ziyanın ödənilməsi də daxildirsə. 

Bunu İranın Xarici İşlər naziri Abbas Əraqçi "Əl-Cəzirə"yə verdiyi müsahibədə deyib.

"Bir çox dost ölkə ideyalar irəli sürüb və sülhün əldə edilməsində rol oynamağa hazır olduqlarını bildirib. Əgər müharibəni dayandırmaq üçün şərtlərimizə cavab verən təklif olarsa və İrana vurulan ziyan ödənilərsə, biz mütləq onu dinləyəcəyik", - deyə, o, bildirib.

Əraqçi əlavə edib ki, Tehran öz mövqeyini "dostlarına" çatdırıb. O, həmçinin vurğulayıb ki, İran hələ də atəşkəsə razılıq verməkdən imtina edir.

Əlavə edək ki, hərbi cəhətdən faktiki olaraq təklənən İranın şiddətli şəkildə bombalanması, hərbi və siyasi rəhbərliyə daxil olan şəxslərin vurulması davam edir. Yeni ali dini rəhbərdən isə səs-soraq yoxdur. Odur ki, hazırda İranın konkret olaraq kim, yaxud kimlər tərəfindən idarə edildiyini söyləmək çətindir. Bu baxımdan İran rəsmilərinin bəyanatlarına bir qədər şübhə ilə yanaşılır.