Baydenin ABŞ prezidenti olması bizim üçün nə deməkdir? - Qubad İbadoğlunun şərh edir

ABŞ-ın Rutgers universitetinin azərbaycanlı professoru Qubad İbadoğlu yaşadığı ölkədəki prezident seçkisini şərh edib.

Azsiyasət.com dünya gündəminin 1 nömrəli mövzusuna aid bu maraqlı şərhi öz oxucusuna təqdim edir:

"Demokratların nümayəndəsi keçmiş vitse-prezident Co Bayden ABŞ-da prezident seçkilərini uddu. İlkin nəticələrə görə Bayden 270 tələb olunan elektoral səsə qarşı 290, Tramp isə 214 toplayıb. Baxmayaraq ki, hələ Şimali Karolina və Georgia ştatlarında yekun nəticələr açıqlanmayıb. Şimali Karolinada Tramp, Atlantada isə Bayden liderdir. Amma Tramp hətta hər 2 ştatda seçkiləri qazansa da bu prezidentlik üçün tələb olunan 270 elektoral səs üçün yetərli deyil.

Baydenin ABŞ prezidenti olması bizim üçün nə deməkdir?

İstənilən halda bu xüsusilə də ABŞ-ın xarici siyasətində daha çox dəyişikliyə gətirib çıxaracaq. Amma bu dəyişikliklər növbəti ildən başlaya bilər. Çünki, Tramp Ağ Evi yanvarın 20-də tərk edəcək.

Növbəti ildən başlayacaq dəyişikliklərə gəlincə, onu Azərbaycana və Qarabağa münasibətdə birmənalı qiymətləndirmək çətindir, müsbət və mənfi çalarları olacaq. Təbii ki, Azərbaycan və Qarabağ üçün Respublikaçıların namizədi Trampın davam etməsi daha uyğun variant idi. Çünki Demokratlar həmişə ermənipərəstliyi ilə fərqləniblər.

Digər tərəfdən Bayden Rusiyaya mənfi, Çinə isə müsbət münasibətilə seçilir. Odur ki, onun dövründə ABŞ-ın xarici siyasət prioritetləri də dəyişə bilər. Təbii ki, bu məsələdə Senatın və Nümayəndələr Palatasının kimin nəzarətində olması da əhəmiyyət kəsb edir.

Bugünə olan nəticəyə görə, Senatda respublikaçılar 48 yerə, demokratlar isə 46 yerə malik olub, çoxluq üçün 51 səs tələb olunur. Şimali Karolina ştatında respublikaçı namizəd liderlik etsə də seçki hələ yekunlaşmayıb".