Xankəndi – Bakı dəmir yolunun bərpası bizə nə verəcək? - ŞƏRH
Bakı - Xankəndi dəmir yolunun bərpası ilə bağlı məlumatlar yayılmaqdadır. Vaxtilə bu yol Xankəndini Moskva və Bakı kimi şəhərlərlə birləşdirirdi. İndi bu yol yenidən bərpa edilərsə, Azərbaycan üçün hansı üstünlükləri ola bilər?
Millət Vəkili Naqif Həmzəyev bildirib ki, Vətən Müharibəsi noyabrın 10-da Azərbaycan, Rusiya və Ermənistan arasında üçtərəfli bəyanatın imzalanması ilə başa çatıb.
“Azad olunmamış ərazilərdə Azərbaycanın suveren hüquqlarının təmin olunması və həmin ərazilərin Azərbaycanın siyasi-inzibati idarəçiliyinə keçməsi Azərbaycan diplomatiyasının növbəti uğurlarındandır. Üçtərəfli bəyanat təkcə təcavüzkar Ermənistanın hərbi təslim aktı, diz çökməsi və işğal edilmiş ərazilərimizdən çıxarılması demək deyil, həm də ölkəmizin geosiyasi və geoiqtisadi qələbəsi oldu”.
N. Həmzəyev qeyd edib ki, prezident İlham Əliyevin təklifi ilə bəyənata daxil edilmiş 9-cu bənd də məhz bölgədəki bütün iqtisadi və nəqliyyat əlaqələrinin bərpasını nəzərdə tutulması da Azərbaycanın milli maraqlarının təmin edilməsindən çıxış edir. Prezident xalqa müraciətində Ağdam - Xankəndi - Şuşa yolunun da müəyyən müddətdən sonra açılacağı müjdəsini verib. Qeyd edib ki, Füzulidən Şuşaya yeni yolun çəkilişi ilə bağlı bütün müvafiq göstərişlər verilib, Prezidentin ehtiyat fondundan vəsait ayrılıb, ilkin olaraq 50 milyon manat: “Əvvəllər Şuşaya gedən yol Ağdam-Xankəndi yolu idi, indi isə hələlik bu yoldan istifadə etmək mümkün deyil. Noyabrın 10-da imzalanmış üçtərəfli bəyanatda göstərilir ki, bütün kommunikasiyalar açılacaq, o cümlədən hesab edirəm ki, Ağdam-Xankəndi-Şuşa avtomobil yolu da müəyyən müddətdən sonra açılacaqdır. Hesab edirəm ki, kommunikasiyaların açılması, eyni zamanda, Naxçıvan Muxtar Respublikası ilə Azərbaycanın əsas hissəsini birləşdirən yollar və kommunikasiyalar gələcəkdə bölgədə uzunmüddətli sülhə də öz töhfəsini verəcəkdir".
N.Həmzəyevin sözlərinə görə, Azərbaycanın digər ərazilərinin Naxçıvanla qırılmış quru (avtomobil, dəmiryolu) əlaqələrinin bərpası ilə Naxçıvanın blokadasına son qoyulacaq, Ağdam-Xankəndi-Şuşa avtomobil yolunun açılması isə işğaldan azad olmuş torpaqlarımızın iqtisadiyyatının inkişafında mühüm rol oyayacaq:
““İzvestisiya” qəzetinin yaydığı məlumata əsasən Xankəndində dəmir yolu rabitəsinin bərpa etməyin mümkünlüyünü müəyyənləşdirmək üçün xüsusi komissiya 30 il əvvəl fəaliyyəti dayandırılmış dəmir yol vağzalına baş çəkib. Sözsüz ki, Xankəndi-Bakı dəmir yolu vağzalının işə salınması da üçtərəfli bəyənatın 9-cu maddəsinə uyğun olaraq Azərbaycanın milli maraqlarına, milli mənafeyimizə xidmət edəcək”.
