Naxçıvan dəhlizi nə vaxt açılacaq?

Azərbaycan, Ermənistan və Rusiya arasında imzalanmış üçtərəfli sazişin bütün bəndləri icra olunur. Sərhədlərimizin bərpası prosesi davam edir. Laçın dəhlizi ilə bağlı nəzərdə tutulan işlər icra olunub. Əraziyə rusiyalı sülhməramlılar nəzarət edir. İki tərəf arasında əsir və girovların dəyişdirilməsi prosesi də yekunlaşmaq üzrədir.

İndi insanları ən çox düşündürən suallardan biri də Naxçıvanla dəhlizin nə zaman yaradılacağı ilə bağlıdır.

Azsiyasət.com xəbər verir ki, mövzu ilə bağlı bakupost.az-a danışan politoloq Qabil Hüseynli qeyd etdi ki, Naxçıvan dəhlizi təkcə Azərbaycan üçün əhəmiyyətli yol deyil:

“Bu, türk dünyasını da birləşdirəcək yol olacaq. Beynəlxalq layihə olduğu üçün ola bilsin ermənilər də burden mənfəət əldə edəcəklər. Ermənistan həmişə beynəlxalq layihələrdən kənar tutulub və təcrid olunmuş vəziyyətdə qalıb. Ermənistan Mehri yolunda bu layihəyə qoşulsa, bunun ardınca da Bakı-Tbilisi-Qars dəmir yoluna qoşulmaq imkanları var. Üstəlik, digər beynəlxalq layihələrin gələcəkdə işə salınması da bölgədə iqtisadi şaxələnməni genişləndirə bilər. Düzdür, Ermənistanda hazırda vəziyyət qarışıb, məzhəb itib. Amma hər halda, Ermənistanın ağıllı adamları başa düşməlidirlər ki, bu layihə onlara mənfəət gətirə bilər, eyni zamanda indiyə kimi Ermənistanın düşdüyü blokada şəraitindən çıxmasına misilsiz dərəcədə yardım göstərə bilər. Yəqin ki, sürətlənən proseslər sırasında Naxçıvan dəhlizi ilə bağlı məsələyə də başlanılacaq. Həm də Laçın dəhlizi ilə Mehri dəmir və şosse yolu üzərində işlərə başlanılması eyni zamanda olacaq”.

Qeyd edək ki, Türkiyənin müdafiə naziri Hulusi Akar Türkiyə və Azərbaycan arasında Naxçıvan dəhlizinin önümüzdəki dövrdə açılacağını bildirib:

“Naxçıvan və Laçın dəhlizləri üzərində işlər bərabər şəkildə aparılır. Azərbaycan, Rusiya və Ermənistan arasında danışıqlar davam edir. Önümüzdəki dövrdə həyata keçəcək. İşlər planlaşdırıldığı kimi davam edir”.