Milli Məclisin deputatlarına tapança verilib?
“Milli Məclisin deputatının statusu haqqında” Qanunda qeyd edilib ki, deputatın təhlükəsizliyini təmin etmək məqsədi ilə ona Azərbaycan Respublikasının qanunvericiliyi ilə müəyyən edilmiş qaydada xidməti silah verilə bilər.
Deputatın öz səlahiyyətlərini icra etdiyi bütün müddət ərzində qanunvericiliklə nəzərdə tutulmuş qaydada və hallarda xidməti silahı saxlamaq, gəzdirmək və təyinatı üzrə istifadə etmək hüququ vardır, zəruri hallarda onun təhlükəsizliyi təmin edilir.
Azsiyasət.com saytı yenisabah.az-a istinadən bildirir ki, qaydalara görə, Azərbaycan Milli Məclisinin deputatları xidməti silah almaq üçün əvəlləcə Daxili İşlər Nazirliyinin (DİN) Baş İctimai Təhlükəsizlik İdarəsinə müraciət etməlidirlər. Burada müraciətinə müsbət cavab verilən millət vəkili daha sonra nazirliyin Təchizat İdarəsindən xidməti silah – tapança ala bilər. Qanunla hər bir silah alan deputat dövlətə müəyyən edlimiş rüsum ödəyir. Deputata silahla birgə 16 nömrələnmiş patron da verilir. Silah gəzdirmək istəyən millət vəkili öncə onunla davranma qaydalarını bilməlidir. Bunun üçün həmin deputat DİN-in müvfiq qurumuna dəvət olunuraq, təlimatlandırılır. DİN silah almaq istəyən deputatın sağlıq durumunu da nəzərə alır.
Deputatlara iclas zalına silahla daxil olmaq qadağan edilib. Milli Məclisin üzvü iclas zalına daxil olmazdan öncə silahını nəzarətçiyə təhvil verməlidir.
Maraqlıdır, Milli Məclis deputatların hazırda silahı varmı? Onlar hüquqlarından istifadə edib tapança almaqdan ötrü DİN-ə müraciət ediblərmi?
Milli Məclisin Hüquq siyasəti və dövlət quruculuğu komitəsinin üzvü Fəzail Ağamalı bildirib ki, qanunvericiliyə görə deputatlar səlahiyyətləri dövründə silah gəzdirmək və ondan təyinatı üzrə istifadə etmək hüququna malikdir:
“Bu qanun qəbul edildikdən sonra deputatların hər birinə silah paylanılmışdı. Ancaq sonradan hansısa bir səbəbə görə bu hal növbəti çağırışlar dövründə təkrar olunmadı. Əksinə, verilən silahlar DİN tərəfindən geri alındı. İndiyə qədər də DİN tərəfindən silah deputatlara paylanılmayıb”.
Deputat silahının olmadığını deyib:
“Hələlik silah almaqdan ötrü DİN-ə müraciət etmək fikrim yoxdur. Əgər ciddi bir ehtiyac yaranarsa bununla bağlı DİN-ə müraciət edərəm. Ümidvaram ki, onlar da qanunvericiliyə uyğun olaraq məni silahla təmin edə bilər”.
Milli Məclisin İnsan hüquqları komitəsinin sədr müavini Tahir Kərimli də deputatın silah saxlamaq hüququna malik olduğunu bildirib:
“Ancaq gərək silah almaq üçün qanunvericilikdə nəzərdə tutulmuş qaydada müvafiq qurumlara müraciət edəsən. Hazırda silahım yoxdur. Silah almaq üçün də müraciətim olmayıb. Mən silahsız gəzməyi daha üstün tuturam”.
Milli Məclisin Beynəlxalq münasibətlər və parlamentlərarası əlaqələr komitəsinin üzvü Elman Nəsirov praktikada deputatların silah gəzdirməsi halına rast gəlməyib:
“Burada əsas məqam ondan ibarətdir ki, biz xalqın seçdiyi insanlarıq. Biz millət vəkilləriyik. Kimdən qorxub özümüzü mühafizə etməliyik ki? Mən həmkarlarımın da silah gəzdirmədiyini görmüşəm”.
Deputat bildirib ki, o silah gəzdirməyə görə hər hansı ehtiyac hiss etməyib:
“Azərbaycan sabit, təhlükəsiz və əminaman bir ölkədir. Mən deputatın silah gəzdirməsinə şərait yaradacaq bir hal ölkəmizdə hiss etməmişəm. Ona görə mən də silah gəzdirməklə bağlı bir ehtiyac görməmişəm”.
Milli Məclisin Regional məsələlər komitəsinin üzvü Cavid Osmanov da silah gəzdirməklə bağlı hər hansı bir müraciət etməyib:
“Azərbaycan çox sabit, əmin-aman bir ölkədir. Hesab edirəm ki, üzərimdə silah gəzdirməyə ehtiyacım yoxdur. Mən insanların içərisinə sərbəst çıxıram, piyada gəzməyi çox sevirəm. Doğulub boya-başa çatdığım Ağdaş rayonuna gedəndə də insanlarla görüşürəm, onların arasında oluram.Silah gəzdirməyə hər hansı bir ehtiyacım yoxdur”.
Milli Məclisin İqtisadi siyasət, sənaye və sahibkarlıq komitəsinin üzvü Rüfət Quliyev isə hesab edir ki, bu gün hər hansı bir deputatın silah gəzdirməsinə ehtiyac yoxdur:
“Bu gün ölkəmizdə əmin-amanlıq və sabitlik hökm sürür. Deputatların silah gəzdirməsinə ehtiyac duymuram”.
