Qarabağın işğaldan azad olunması regiona nə verəcək? - Batiaşvili şərh edir

Biz bir neçə gün Azərbaycanda olduq, işğaldan azad edilmiş əraziləri gəzdik. Qarabağda xarabalığa çevrilmiş kəndləri gördük. Mən orada gördüklərimdən dəhşətə gəldim. İllər ərzində Qarabağda bütün tikililər, hətta yollar dağıdılıb. Bu əraziləri ürək ağrısı olmadan izləmək olmur.

"Azsiyaset" xəbər verir ki, bu sözləri Azərtac-a müsahibəsində Azərbaycanda səfərdə olmuş Gürcüstanın Rondeli Fondunun Yaxın Şərq üzrə mütəxəssisi Zurab Batiaşvili söyləyib.

Onun sözlərinə görə, işğaldan azad olunmuş ərazilərin bərpası istiqamətində hazırda mühüm işlər görülür:

“Biz gördük və bir daha əmin olduq ki, Azərbaycan çox güclü dövlətdir. Azərbaycan xalqı çalışqan və güclü, möhkəm iradəyə malik olan bir xalqdır. Biz Şuşada da olduq. Şuşanın bərpası istiqamətində görülən işlər, bölgədə yaradılan yeni infrastruktur hamı kimi, bizim də xoşumuza gəldi. Şuşada aparılan bərpa və yenidənqurma işləri çox heyranedici idi. Qısa bir zamanda çox böyük işlər görülüb.

Z.Batiaşvili deyib: “Bu da, onu deməyə əsas verir ki, Azərbaycan Qarabağın bütün bölgələrini gözəl məkana çevirəcək. Əminəm ki, Azərbaycan o bölgəni çox gözəl məkana çevirəcək. Düzdür bu bir günə, bir aya başa gələn işlər deyil. Bu gün artıq Azərbaycan dövləti bölgədə quruculuq işlərinə başlayıb. İnanıram ki, çox yaxın vaxtlarda həmin xarabalıqlar cənnət bir məkana çevriləcək”.

Zurab Batiaşvili onu da deyib ki, Azərbaycanın öz gücünə torpaqlarını işğaldan azad etməsi bütün regionun inkişafına təkan verəcək.

“Əgər bir qonşunda alov, atəş varsa, bu sənin üçün də problem yarada bilər. Əgər kimsə bu atəşi, alovu söndürübsə, bu, sənin də xilasın deməkdir. Azərbaycanın öz torpaqlarını azad etməsi həm də bizim inkişafımıza təkan verəcək”, – deyə Batiaşvili vurğulayıb.