İran səfiri ovunmur - Yenə erməni nazirin qəbuluna getdi

İranın Ermənistandakı səfiri Abbas Bədəxşan Zühuri yenidən Ermənistan XİN rəhbəri Ararat Mirzoyanla görüşüb.

Rəsmi məlumatda səfir və nazirin ikitərəfli əməkdaşlığın müxtəlif sahələrini müzakirə etdiyi bildirilib. Həmçinin ticari-iqtisadi münasibətlərin inkişafı, ticarət dövriyyəsinin 1 milyard dollara çatdırılması üçün “konkret proqram”ın reallaşdırılması haqda da danışılıb.

“Elektrik enerjisinin qazla dəyişdirilməsi” məsələsinə toxunduqdan sonra isə tərəflər regiondakı vəziyyətə keçiblər.

Erməni nazir Azərbaycanın “provokasiyası” və “Ermənistanın suveren ərazisinə iddiası”nın regional sülhü pozduğunu bildirib. Bu kontekstdə Mirzoyan İranın Ermənistanın ərazi bütövlüyü ilə bağlı mövqeyini yüksək qiymətləndirdiyini deyib.

Eyni zamanda Gorus-Qafan yolundakı vəziyyət də müzakirə edilib və erməni nazir çəkilən alternativ yol və “Şimal-Cənub” şosesi haqda məlumat verib.

Qeyd edək ki, İranın Ermənistandakı səfiri son bir neçə gündə olduqca fəallıq göstərir. O, vaxtaşırı olaraq medianın diqqətini Azərbaycan əleyhinə açıqlamaları ilə çəkir. Paralel olaraq isə Ermənistan rəsmiləri ilə ardıcıl və təkrar görüşlər keçirir. Bu gün o, həm də Ermənistan vitse-premyeri Suren Papikyanla görüşüb.

Azərbaycan Ermənistanın ərazisinə iddia etmir və etməyib. Regionda hansı işğalın sülhü 30 ildir necə pozduğunu isə Ermənistan XİN rəhbərinin yalanlarına şərik olan İran səfiri çox yaxşı bilir.