Müflisləşən banklarda pulu qalanlar nə etməlidir? - "Vəsaitləri başqa cür qaytarmaq mümkün deyil..."
“Bu ay bir neçə müflisləşmiş bankın kreditorar komitəsinin ilk iclası olacaq. Kreditorlar komitəsi müflis bankda pulu qalanların qurumudur. Həmin qurum ləğvediciyə, yəni Əmanətlərin Sığortalanması Fonduna nəzarət etməlidir ki, adıçəkilən qurum bankın olan-qalan əmlakının başına daş salmasın və onu kreditorlar arasında ədalətli şəkildə bölsün”.
"Azsiyaset" azpolitika.info-ya istinadla xəbər verir ki, bu fikirləri bank üzrə ekspert, hüquqşünas Əkrəm Həsənov səsləndirib:
Ekspert bunun üçün təkliflərini belə sıralayıb:
"1) Heç bir kreditora qanunsuz ödəniş etməsin (heç kəsi “qabağa salmasın”);
2) Bankın əmlakını qənaət rejimində idarə etsin (“otkat”lara, yersiz xərclərə yol verməsin);
3) Bankın əmlakını açıq hərracda tezliklə dürüst satsın (su qiymətinə satmasın);
4) Banka borcu olanlardan borcu vaxtında və dürüst tələb etsin (borclularla sövdələşməyə və güzəştlərə getməsin);
5) Pərdəarxası oyunlara getməsin, korrupsiyaya qurşanmasın və sairə".
Bütün bunlara necə nail olmaq olar?
Əkrəm Həsənov vurğulayır ki, bunun üçün kreditorlar komitəsi işlək qurum olmalıdır: "Kreditorlar vəsaitlərinin xeyli hissəsini qaytarmaq istəyirlərsə, komitə rəhbərliyinə peşəkarları cəlb etməlidirlər. Komitə ləğv prosesini tam nəzarətə götürməli, bütün sənədlərlə tanış olmalıdır. Bunun üçün apellyasiya məhkəməsindəki ləğv icraatına üçüncü şəxs kimi də qoşulmaq lazımdır".
Mütəxəssis əlavə edir ki, komitə ləğvedicidən rüblük hesabatları və ləğv planını alıb təhlil etməli, etirazlar və vəsatətlər verməlidir. Onun sözlərinə görə, Komitə bütün hərraclara nəzarət etməlidir: "Ən əsası isə banka borcu olan və barəsində məhkəmə prosesinə başlanılanlar barədə ləğvedicidən məlumat tələb etməlidir. Ləğvedici saf niyyətlidirsə, şəffaf olmalıdır".
Ə.Həsənov bildirir ki, komitə olmadan da ləğvedici qanunvericiliyin tələblərinə əsasən kreditorlara rüblük maliyyə hesabatı və ləğv planını təqdim etməlidir: "Amma etmir. Ləğv prosesi əvvəlki illərdə olduğu kimi qeyri-şəffaf və qanun pozuntuları ilə həyata keçirilir. Əmanətlərin Sığortalanması Fondunun hazırda savadlı və dürüst rəhbəri var. Amma orada başda müavini Vüqar Abdullayev olmaqla köhnə komandanın da nümayəndələri çoxdur. Onların necə işləməsinə isə yaxşı bələdik. Buna görə də komitələr elə ilk növbədə Fondun yeni rəhbərinə dəstək olmalıdırlar. Çünki o təkbaşına bu proseslərə nəzarət edə bilməz.Ümumiyyətlə, kreditorların özündən başqa ləğv prosesinin dürüst və ədalətli həyata keçirilməsində heç kəs daha çox maraqlı ola bilməz. Buna görə də fəal, prinsipial və ardıcıl olmaq lazımdır. Başqa cür pulları qaytarmaq mümkün deyil".
