"Azərbaycan üçün tamamilə yeni imkanlar açıla bilər..." - Aleksey Overçuk şərh edir

Azərbaycan Asiya və Avropa bazarlarını birləşdirmək üçün tamamilə yeni imkanlara malik ola bilər. Yerli KİV-lər xəbər verir ki, bunu Rusiya baş nazirinin müavini Aleksey Overçuk Bakıda keçirilən “İnteqrasiya edilmiş proseslər kontekstində Rusiya-Azərbaycan münasibətlərinin hazırkı vəziyyəti və perspektivləri” adlı konfransda deyib.

“Biz burada birlikdə işləyə və birgə uğur qazana bilərik. Rusiyanın Azərbaycana sərmayələri 4,5 milyard dollara, Azərbaycanın isə Rusiyaya sərmayələri 1,5 milyard dollara çatıb. Rusiya biznesi Azərbaycanda işləməkdə maraqlıdır və dəmir yollarının inkişafı və yaradılması, bərpa olunan enerji mənbələrinin, yüksək texnologiyalı müəssisələrin, logistikanın inkişafı üçün yaxşı perspektivlər var. İndi bizim qarşımızda Şimal-Cənub və Qərb-Şərqi birləşdirmək üçün yeni imkanlar açılmışdır. Bunun nəticəsində bütün qalib gələ bilər”, - Overçuk bildirib.

Overçuk həmçinin bildirib ki, Cənubi Qafqazda nəqliyyat kommunikasiyalarının açılması istiqamətində fəal iş aparılır.

Həmin  konfransda Azərbaycanın baş nazirinin müavini Şahin Mustafayev də çıxış edib, Azərbaycanı Rusiyanın Cənubi Qafqaz regionundakı əsas tərəfdaşı adlandırıb.O, gələn il iki ölkə arasında diplomatik münasibətlərin 30 illiyinin qeyd olunacağını bildirib: “Ötən müddət ərzində əməkdaşlığımız daim inkişaf edib”.

Baş nazirin müavini son iki ildə dünyanın koronavirus pandemiyası da daxil olmaqla bir sıra təhlükələrlə üzləşdiyini xatırladıb: “Yeni reallıqlar əməkdaşlığımız üçün yeni imkanlar açıb. İki ölkə arasında müxtəlif sahələrə dair 7 yol xəritəsi təsdiqlənib. Hazırda ölkəmizdə Rusiya kapitallı 1110-dək müəssisə fəaliyyət göstərir".

Ş.Mustafayev 44 günlük müharibədən sonra azad olunmuş ərazilərdə yeni əməkdaşlıq imkanlarının yarandığını söyləyib, bununla bağlı Rusiya tərəfindən 13 layihə təqdim edildiyini diqqətə çatdırıb.