"Biz Rusiyadan qurtulmayana qədər mən bu problemin həllini görmürəm..."
Ötən gün Rusiya Sülhməramlı kontingentinin nəzarətində olan Tərtər rayonunun Ağdərə istiqamətindəki ərazilərdən mövqelərimiz qondarma rejimin terrorçuları tərəfindən atəşə tutulub. Təbii ki, baş verən hadisə bir daha Rusiya sülhməramlılarının fəaliyyətsizliyini gündəmə gətirib.
Təssüflər olsun ki, Azərbaycana sülh prosesi adıyla gəlmiş həmin “sülh göyərçini” olan kontingent bu hadisəyə adekvat hər hansı bir münasibət bildirməyib. Bununla yanaşı, bir neçə gün öncə Caliber.az-ın yaydığı görüntülərdə də ermənilərin Rusiya hərbi kontingentinin müşayiəti altında yeni postlar quraraq səngərlər qazdığı öz əksini tapıb.
"Azsiyaset" xəbər verir ki, moderator.az-a açıqlamasında politoloq Sülhəddin Əkbər Rusiyanın iştirakıyla qarşıda daha irimiqyaslı provakasiyaların ola biləcəyini deyib:
“Bilmək lazımdır ki, bizim qarşımızda duran Ermənistan yox, artıq Rusiyadır. Ona görə də belə hallar davamlı olacaqdır. Hələ bundan böyük irimiqyaslı provakasiyalara da hazır olmaq lazımdır. Yəni biz Rusiyadan qurtulmayana qədər mən bu problemin həllini görmürəm. Bir sözlə, bu Rusiya məsələsidir və bu qurtarmayana qədər məsələ bitməyəcək. Artıq dəfələrlə bu fikri səsləndirmişik. Hər şey bu qədər bəsitdir”.
