Makron Kiyevə təkliflərlə gəlib, yoxsa ideyalarla?
Fransa Prezidenti Emmanuel Makron Kiyevə səfərində heç bir təklif səsləndirmədi, tərəflər yalnız ideyaları müzakirə etdilər.
Bunu Ukraynanın xarici işlər naziri Dimitri Kuleba Fransa Prezidentinin Kiyevə səfəri barədə danışarkən deyib.
“Prezident Makron Kiyevə təkliflərlə deyil, ideyalarla gəlmişdi. Biz indi elə bir dönəmdəyik ki, kimlərlə təmasda oluruqsa, vəziyyəti dalandan çıxarmaq üçün məqbul kompromisləri və addımları maksimum anlamağa çalışırlar”, – Kuleba bildirib.
XİN başçısı qeyd edib ki, Ukrayna rəhbərliyi üçün xaricdən edilən hər hansı təzyiq qarşısında geri çəkilmək qəbuledilməzdir.
Qeyd edək ki, fevralın 8-də Fransa lideri Kiyevdə Ukrayna Prezidenti Volodimir Zelenski ilə danışıqlar aparıb. Bundan əvvəl isə E.Makron Moskvada Rusiya Prezidenti Vladimir Putinlə Ukrayna böhranının nizamlanmasının mümkün yollarını müzakirə edib.
