"Azərbaycan müstəqilliyinin ABŞ-dan böyük tərəfdarı yoxdur" - Vaşinqton
“Azərbaycanın dostu kimi Birləşmiş Ştatlar sülhün bərqərarına və bütün regionun çiçəklənməsinə kömək etmək üçün iqtisadi, nəqliyyat və insanlar arasında əlaqələrin qurulmasına kömək etməyə hazırdır”, - ABŞ-ın Azərbaycandakı səfiri Li Litzenberqer iki ölkə arasında diplomatik münasibətlərin qurulmasının 30 illiyi münasibətilə bildirib.
“Birləşmiş Ştatların bu çoxmillətli dövlət-özəl sektor arasındakı tərəfdaşlığa davamlı dəstəyi Avropanın enerji təhlükəsizliyini yaxşılaşdırmaq, onun karbondan asılılığının azaldılması səylərini dəstəkləmək və Avropaya qaz tədarükünü şaxələndirmək məqsədimizin bir hissəsi idi”, - səfir deyib.
Təhlükəsizlik sahəsində əməkdaşlıq məsələsinə gəlincə, səfirin sözlərinə görə, Azərbaycan terrorizmlə mübarizədə ön sıralardadır və NATO-nun Əfqanıstandakı missiyasına öz töhfəsini verib: “Biz təhlükəli materialların və narkotiklərin qarşısını almaq və Xəzərdəki enerji ehtiyatlarını qorumaq üçün Azərbaycanla sıx əməkdaşlıq edirik”.
“Xalqlarımız arasındakı əlaqələr bizi birləşdirir – ABŞ-da təhsil alan tələbələr, mübadilə proqramları, ortaq mədəniyyətin qorunması proqramları üzrə işlər, jurnalistlərə dəstək – biz hər gün Azərbaycan xalqı ilə birgə çalışırıq”, - Litzenberqer deyib.
Dövlət katibinin köməkçisinin müavini Erika Olson ikitərəfli münasibətlərin 30 illiyilə bağlı deyib: “Biz gələcəyə baxarkən iki ölkə arasında ticarət, təhsil və mədəniyyət əlaqələrini gücləndirməyi səbirsizliklə gözlədiyimiz kimi, Azərbaycanın iqtisadiyyatını şaxələndirmək və Avropanın enerji təhlükəsizliyini gücləndirmək səylərini dəstəkləməyə sadiq qalırıq. Biz Azərbaycanın insan hüquqlarına və əsas azadlıqlarına hörməti gücləndirmək səylərini dəstəkləməyə sadiqik. Biz Azərbaycanla və regiondakı digər dövlətlərlə davamlı sülhün əsaslarını yaratmaq üçün çalışacağıq”.
“Diplomatik münasibətlərimizdə bu əlamətdar ildönümünü qeyd edərkən biz təkcə geriyə deyil, həm də irəliyə baxırıq. Biz 30 ildir tərəfdaşıq və mən əminəm ki, tərəfdaşlığımız bizi gələcək onilliklərə aparacaq. Biz hamı üçün demokratik, firavan və dinc gələcək naminə Azərbaycanla işləməyi səbirsizliklə gözləyirik”, - Olson deyib.
Amerika səfirliyi xatırladır ki, Birləşmiş Ştatlar Azərbaycanla diplomatik əlaqələri 1992-ci ildə müstəqillik dövründə qurub. 1992-ci il fevralın 12-də dövlət katibi Beyker Azərbaycanda səfərdə olub. 1992-ci il fevralın 19-da prezident Corc Buş mətbuata açıqlamasında bu qərarı elan edib. 1992-ci il martın 16-da ABŞ-ın Bakıdakı səfirliyi açılıb, Robert Finn müvəqqəti işlər vəkili təyin edilib.
Hər iki dövlət Avropanın enerji təhlükəsizliyini təşviq etmək, ikitərəfli ticarət və sərmayələri genişləndirmək, terrorizm və transmilli təhdidlərlə mübarizə aparmaq üçün birlikdə çalışır. Birləşmiş Ştatlar Azərbaycanda demokratiyanın möhkəmləndirilməsinə və iqtisadiyyatın şaxələndirilməsinə yardım etmək öhdəliyinə sadiqdir. Birləşmiş Ştatlar Dağlıq Qarabağ münaqişəsinin, ATƏT-in Minsk Qrupunun vasitəçiliyi də daxil olmaqla, uzunmüddətli və davamlı siyasi həllinin həyata keçirilməsi səylərini qətiyyətlə dəstəkləyir və regional sabitlik, sülh və rifahı təşviq edir.
“Azərbaycanın ABŞ ilə diplomatik münasibətlərinin və Azərbaycanın Sovet İttifaqından ayrılmasının 30-cu ildönümünü qeyd etdiyimiz bir vaxtda Cənubi Qafqazda müstəqillik və demokratiyanın ABŞ-dan böyük tərəfdarı yoxdur”, - ABŞ diplomatik missiyasının bəyanatında deyilir.
