Rusiya-Ukrayna müharibəsinin qlobal hədəfləri: yeni texnikaların tətbiqi - İLGİNC ŞƏRH

Rusiya-Ukrayna müharibəsi iki konteksdə diqqət çəkir: 

1. Rusiyanın Ukraynaya hücumu (hərbi) 

2. Qərbin Rusiyaya hücumu (iqtisadi)

- Rusiya Ukrayna üzərindən Qərbin planlarını bloklamağa çalışır, cəbhə yaradır, Qərblə Şərqi birləşdirən nöqtələrdə dağıdıcılığı, anarxiyanı təmin edir. Sivil nöqtələri qənaətbəxş hesab etmir. 

- Qərb Ukrayna üzərindən Rusiyanın Şərqdəki hegemon müqavimətini və Avropadakı dayaq nöqtələrini qırmağa çalışır. 

Hər iki plan Ukrayna üzərindən həyata keçirildiyinə görə, nəticədə Ukrayna poliqona çevrilir.

Ukrayna əhalisi kütləvi şəkildə ölkəni tərk etdiyinə görə, oraya terrorçu qruplaşmaların rahat şəkildə fəaliyyəti də təmin edilir.

Ukrayna əhalisinə qucaq açan ölkələr Ukraynanın poliqona çevrilməsini legitimləşdirirlər. 

Yuxarıdakı 1-ci və 2-ci faktorlar göstərir ki, bu müharibəni Rusiya-Ukrayna müharibəsi kimi dəyərləndirmək doğru olmazdı. Düzdür, deyilə bilər ki, Rusiya hücum etməsəydi, Qərb də sanksiyalar tətbiq etməzdi. Amma nəzərə almaq lazımdır ki, Rusiyaya sanksiyaların tətbiqi Qərb üçün alternativsiz yol idi və bu sanksiyaların tətbiqi üçün Rusiyanı növbəti dəfə işğalçı siyasətə itələmək lazım idi.

Düşündürücüdür, heç bir Qərb dövləti Rusiya ilə birbaşa danışığa gedərək ölkədə günahsız insanların ölümünü əngəlləməyə, yüz minlərlə insanın ölkədən köç etməsinin qarşısını almağa çalışmır.  

Şübhəsiz, bütün planların altyapısı mövcuddur. Putin Rusiyaya tətbiq ediləcək sanksiyaların miqyasını və təsir dairəsini əvvəldən hesablamışdı? Şəksiz! Digər tərəfdən, köhnə və primitiv rus texnikaları ilə Ukraynaya hücum edib itkilər vermək, özünü məğlub kimi göstərmək nədən xəbər verir? Çox incə, strateji hərbi həmlələr tətbiq olunur. Rusiya böyük itkilər verir, amma Ukraynanın strateji nöqtələrini də sıradan çıxarır. Ölkənin bərpası mümkünsüzlüyə çevrilir.

Sanksiyalar soyuq müharibənin vacib qoludur. Soyuq müharibənin yeni mərhələsinə qədəm qoyacağıq - silahlanma! Bu müharibələr zamanı XX əsrin hərbi sənayesi də tarixə gömülür. 

Köhnə texnikaların uduşlu şəkildə məhvi və yeni texnikaların sınaq tətbiqi müharibənin qlobal hədəflərinə hesablanıb.

Müəllif: Samir Feyruzov