"Ukrayna üzərində uçuşa qadağa Üçüncü Dünya müharibəsinə gətirib çıxaracaq" - "The Independent" nəşri...
ABŞ Senatının Respublikaçılar partiyasından olan üzvü Marko Rubio Ukrayna üzərində uçuşa qadağa qoyulmasını tələb edənlərə sərt xəbərdarlıq edib. Onun fikrincə, bu, yeni qlobal münaqişəyə səbəb ola bilər.
Bu barədə “The Independent” nəşrinə istinadla xəbər verir.
"Məncə, insanlar uçuşa qadağan zonanın nə demək olduğunu başa düşməlidirlər. Bu, sizin qəbul etdiyiniz və hər kəsin əməl etməli olduğu bir qaydaya bənzəmir. Bu, Rusiya Federasiyasının təyyarələrini vurmağa hazırlıqdır və əslində Üçüncü Dünya müharibəsinin başlanğıcıdır”, - deyə Floridadan olan senator bildirib.
“Açığını deyim ki, təkcə Ukraynada deyil, həm də Rusiya ilə Belarusda rusların yerləşdirdiyi hava hücumundan müdafiə sistemlərini sıradan çıxarmağa hazır deyilsinizsə, NATO təyyarələrini orada yerləşdirə bilməzsiniz”, - deyə Rubio izah edib.
Qeyd edək ki, Ukrayna prezidenti Volodimir Zelenski Vaşinqtonu ölkəsi üzərində uçuşa qadağan zona yaratmağa çağırıb. Nəşr xatırladır ki, hər iki partiyadan olan amerikalı qanunvericilər bu təşəbbüsü çox təhlükəli adlandırıblar, çünki bu, dünyanın iki aparıcı nüvə dövləti olan ABŞ və Rusiya arasında birbaşa münaqişəyə səbəb ola bilər.
Demokratlar da oxşar narahatlıqlarını ifadə ediblər. “The Independent” yazır ki, Zelenski ilə konqresmenlər arasında “Zoom” danışıqlarından sonra deputat Bred Şerman Ağ Ev tərəfindən hazırlanan uçuşa qadağan zonaya “daha az təhlükəli alternativ” təklif edib. Şermanın sözlərinə görə, Zelenski ABŞ-dan daha müasir təyyarələr müqabilində Polşa və Rumıniyaya Sovet qırıcılarını Kiyevə köçürməyə icazə verməsini istəyib. "Bu, uçuşa qadağa zonasından daha təhlükəsizdir, çünki rusların amerikalılar tərəfindən öldürülməsini nəzərdə tutmur", - deyə o, Twitter-də yazıb.
Amma ideyanın tərəfdarları da var. “The Independent” yazır ki, NATO-nun Avropadakı keçmiş baş komandanı, ABŞ generalı Filip Bridlav Moskva ilə gərginləşən qarşıdurma riskinə baxmayaraq, Qərbin nə vaxtsa Ukrayna üzərində uçuşa qadağa zonası tətbiq etməli olacağını təklif edib.
