"Paşinyan deyəcək ki, KTMT-dən çıxırıq" - Ermənilərin "artsax-dan köçü başlaya bilər
Onların məqsədi budur ki, əhalini inandırsınlar – ordumuz yoxdur, Rusiyanın və KTMT-nin timsalında müttəfiqimiz də yoxdur və bizə nə etmək qalır? İmzalamalıyıq (Azərbaycanla sülh müqaviləsini-red.)”.
Azsiyaset.com azpolitika.info-ya istinadla xəbər verir ki, bunu Ermənistan Baş Qərargah rəisinin sabiq müşaviri, beynəlxalq təhlükəsizlik eksperti Vladimir Poqosyan “Sputnik”ə müsahibəsində söyləyib.
Poqosyan deyib ki, Nikol Paşinyan parlamentdəki son çıxışında Ermənistanın çıxılmaz vəziyyətdə qaldığına, ordunun və real müttəfiqlərin olmadığına işarə vurmaqla, Qarabağın rus hərbi kontingentinin müvəqqəti nəzarətindəki ərazisində yaşayan ermənilər arasında qorxunu, panikanı daha da artırıb: “Getdikcə, ordu daha da zəifləyəndən sonra Paşinyan deyəcək ki, KTMT bizə lazım deyil, biz bu təşkilatdan çıxırıq. Bu, indiki hakimiyyətin arxasında duranların planıdır, KTMT-nin, öz silahlı qüvvələrimizin, sülhməramlıların gözdən salınması da onlardan gəlir...
Deyildi ki, yeni müharibə olacağı halda dünya birliyi bizə kömək etməyəcək. Faktiki olaraq bu, Rusiyaya da aiddir. Bu bəyanat böyük əks-səda yaratdı. Gün ərzində mən “artsax”dan çoxlu siqnal aldım ki, oradan əhalinin kütləvi və nəzarətsiz köçü başlaya bilər”.
Əsas etibarilə revanşist siyasi qüvvələrin düşərgəsində yer alan Poqosyan Paşinyanın Azərbaycanla tezliklə sülh müqaviləsinin bağlanmasına və Ermənistanın başqa yolunun olmadığına dair fikirlərini təhlükəli sayır. O, hesab edir ki, bununla da Baş nazir Türkiyə və Azərbaycanın maraqlarına xidmət etmiş olur.
Göründüyü kimi, son Brüssel görüşündə əldə edilən razılaşmalar, Rusiyanın danışıqlar prosesinə təsirinin mümkün qədər azaldılması və Avropa İttifaqının önə çıxması, eləcə də sülh müqaviləsilə bağlı qismən də olsa perspektivlərin artması, İrəvandakı Rusiya yanlılarını fəallaşdırıb. Məqsəd, nəhayət ki, tərəflər arasında mümkün qarşılıqlı razılaşmanı, dövlətlərin bir-birinin ərazi bütövlüyünü tanımasını, sülh əldə edilməsini əngəlləməkdir. Bu da gözlənilən haldır. Çünki Rusiyanın əsrlər boyu regionumuzda yürütdüyü siyasət yalnız özünün imperiya maraqlarına xidmət edib və buradakı xalqların normal sülh şəraitində yaşamasına qətiyyən xidmət etməyib.
