Ermənistan Gəncəyə niyə raket atıb? - "Onlar çalışırlar ki, beynəlxalq təşkilatları, müttəfiq saydıqları məmləkətləri bu prosesə qatsınlar" - Ekspertlər danışır
Separatçıların “rəhbər”i Araik Arutyunyan bu gün saat 10 radələrində Ermənistan ərazisindən Gəncənin atəşə tutulması əmrini özünün verdiyini elan edib.
Azsiyasət.com xəbər verir ki, bu barədə o, öz feysbuk hesabında məlumat verib.
“Mənim əmrimə əsasən bu gün Ermənistan ordusu tərəfindən Gəncə şəhərindəki hərbi obyektləri zərərsizləşdirmək üçün bir neçə raket zərbələri endirilib”, - deyə separatçıların “lider”i bildirib.
Mövzu ilə bağlı millət vəkili Rasim Musəbəyov qafqazinfo-ya açıqlamasında bildirib ki, əslində separatçı “respublikanın lideri”nin bu bəyanatı izi itirmək üçündür:
“Qondarma Dağlıq Qarabağın “prezident”i Araik Arutyunyan qələt edir, onun nə imkanı, nə də səlahiyyəti çatır ki, Gəncənin vurulması ilə bağlı əmr versin. O, bu cinayətin izini itirmək üçün bu cür danışır. Əslində atəş Ermənistan ərazisindən raketlər vasitəsilə atılıb. Buna görə də onlar cəzalarını alacaqlar”.
R.Musabəyov əlavə edib ki, bunu Azərbaycan hərbi rəhbərliyi birmənalı şəkildə bəyan edib.
Politoloq Şahin Cəfərli də hesab edir ki, Gəncənin atəşə tutulması Ermənistan ərazisindəki atəş nöqtələrinə və hərbi obyektlərə cavab zərbələri endirməyə legitim əsas yaradır:
“Amma düşünürəm ki, bu mərhələdə təmkinli və soyuqqanlı hərəkət etmək lazımdır. İlk növbədə Xankəndi və işğal altındakı digər yerlərdə olan bütün hərbi hədəflər intensiv şəkildə vurulmalıdır. Vəziyyətin inkişafına uyğun olaraq sonrakı mərhələdə daha sərt variantlara əl atıla bilər”.
Politoloq Tofiq Abbasov isə məsələni belə şərh edib:
“Araik Arutyunyan özfəaliyyətlə məşğuldur və çalışır Ermənistan Respublikasının Azərbaycana qarşı etdiyi yeni cinayətkar akta bəraət qazandırsın. Guya bu məhz qondarma respublikanın “silahlı qüvvələri”nin cavab atəşidir. Əslində Azərbaycanın hərbi komandanlığı və eləcə də Prezidentin köməkçisi Hikmət Hacıyev bugünkü brifinqdə bildirdi ki, atəş Ermənistan tərəfindən atılıb”.
O, qeyd edib ki, Araik Artrutyan siyasi retuşla məşğuldur: “Ermənistanın bu məsələlərdə cinayətkarcasına, həm də qarşıdurma arealını artırma niyyəti bir şeylə bağldır. Onlar çalışırlar ki, beynəlxalq təşkilatları, müttəfiq saydıqları məmləkətləri bu prosesə qatsınlar. Ancaq bu, əbəsdir. Bizim Ali Baş komandanlıq bildirdi ki, əməliyyatımızın mahiyyəti əks- hücum xarakteri daşıyır. Biz öz torpaqlarımızdan Ermənistanın cinayətkar ordusunun ayağını yığışdırmağa başlamışıq. Bizim ərazi bütövlüyümüz BMT və bütün dövlətlər tərəfindən tanınır”.
Politoloq hesab edir ki, Ermənistan bununla Kollektiv Təhlükəsizlik Müqaviləsi Təşkilatını (KTMT), Rusiyanı bu məsələrə qatacağına böyük ümidlər bəsləyirdi. Amma bu, alınmadı. Rusiya rəhbərliyi açıq şəkildə bildirdi ki, bu məsələdə neytraldır, heç bir tərəfi dəstəkləmir.
