Azərbaycan kommunistlərinin aqibəti necə olacaq...

Rusiya-Ukrayna müharibəsinin gedişində Ukraynada fəaliyyət göstərən Kommunist Partiyasının fəaliyyəti dayandırılıb. Bu addımdan sonra digər ölkələrdə fəaliyyət göstərən Kommunist Partiyalarının da ləğv olunacağı bildirilir.

Belə bir məqamda Kommunist partiyalarının Rusiyadan maliyyələşməsi barədə iddialar ortaya atılıb və bütün ölkələrdən bu siyasi təşkilatın fəaliyyətinə qadağa qoyulması tələb olunub.

Bəs Azərbaycan Kommunist Partiyasının aqibəti necə olacaq?

Bu barədə danışan partiya sədri Rauf Qurbanov Ukraynadan fərqli olaraq Azərbaycanda ictimai-siyasi mühitin tamamilə başqa olduğunu deyib.

Partiya sədrinin sözlərinə görə, Azərbaycanda siyasi plüralizm, tolerantlıq və multikulturalizm mövcuddur: 

"Siyasi baxışlarından, ideoloji oriyentasiyasından asılı olmayaraq, bütün partiyaların Azərbaycanda fəaliyyət göstərməsi üçün münbit şərait var. Ukraynada Kommunist Partiyasına indi yox, hələ 2015-ci ildə məhz “Maydan” hadisələrindən sonra qadağa qoyulub. 30 ilə yaxın bir dövürdə, Ukrayna Kommunistləri Ali Rada da say tərkibinə görə ikinci böyük fraksiya  olaraq fəaliyyət göstəriblər. Ukrayna kommunistlərinin lideri Pyotr Simonenko 1999-cu ildə keçirilən prezident seçkilərində seçicilərin ümumi səsinin 36,5 faizini toplayaraq ikinci tura çıxıb, son nəticədə faliyyətdə olan prezident Leonid Kuçmaya məğlub olub. 2014-cü ildə dövlət çevrilişindən sonra hakimiyyətə gəlmiş “demokratlar” Ukrayna Kommunist Partiyası kimi cəmiyyətdə ciddi dayaqlara malik olan siyasi bir qurumun  fəaliyyətini dayandırdılar. Hətta partiyaya aid olan simvolların və emblemlərin gəzdirilməsinə qadağa qoydular. Bu cür hərəkət sözün əsl mənasında faşizmdir. Bu gün Ukraynada cərəyan edən hadisələr mənim fikrimi bir daha təsdiq edir. Kommunist Partiyası ilə yanaşı, Ukraynada digər 8 partiyanın da fəaliyyəti Rusiyayönümlü olmaqda suçlandırılaraq dayandırılıb. Ümumiyyətlə, siyasi partiyalar hansısa dövlətə yönümlüklərinə görə yox, ideoloji mənsubluqlarına görə fərqlənirlər".

Dünyanın 193 ölkəsində Kommunist partiyalarının və sol təmayüllü partiyaların fəaliyyət göstərdiyini xatırladan Rauf Qurbanov qeyd edib ki, əksər ölkələrdə kommunist və sol partiyalar iqtidarda təmsil olunur:

"Məsələn, Çin Xalq Respublikasında (ÇXR), Vyetnamda, Kubada, Şimali Koreyada, Laosda kommunistlər, Avropa dövlətlərində - Norveçdə, Almaniyada, İsveçdə, Avstryada və bir sıra digər ölkələrdə isə solçular hakimiyyətdədirlər. Dünyanın iqtisadi cəhətdən ən qüdrəti dövləti olan Çin məhz Kommunist Partiyasının rəhbərliyi altında qısa bir zaman kəsiyində böyük tərəqqiyə nail olub, dünyanın iqtisadi cəhətdən ən aparıcı ölkəsinə çevrilib. Cəmiyyətin müxtəlif təbəqələrini, fəhlə və kəndliləri, ziyalıları öz ətrafında birləşdirən bir partiyanın fəaliyyətini hansı əsaslarla qadağan etmək olar?".

"Dünyanın aparıcı kapitalist dövlətlərində, ABŞ-da, Böyük Britaniyada, Fransada, İtaliyada,İspaniyada və digər dövlətlərdə Kommunist partiyaları fəaliyyət göstərir. Kommunizm ideologiyası elə bir ümumbəşər - beynəlmiləl ideologiyadır ki, onun rüşeymləri daima kapitalizmin gövdəsində yaşayır və yaşayacaq. Partiyanın rəsmi qeydiyyatı isə formal xarakter daşıyır. Nə qədər ki, cəmiyyətdə antaqonist ziddiyyətlər mövcuddur, bir sinifin digər sinif üzərində hökmranlığı var, Kommunizm ideologiyası insanların beynində, şüurunda, ürəyində yaşayacaq və sosial ədalətli cəmiyyətin qurulması üçün daima mübarizə aparılacaq" - partiya sədri vurğulayıb.

Kommunistlərin Rusiyadan maliyyələşməsinə gəlincə, Rauf Qurbanov deyilənlərə əhəmiyyət vermədiyini söyləyib(modern.az).