"Beynəxalq təşkilatlarda görüşəndə gürcülərə sözümü deyəcəm" - Eldar Quliyev
Ermənilərin cəbhə xəttində həyata keçirdiyi təxribatlardan, mülki əhalini müxtəlif kalibrli silahlardan atəşə tutmasından sonra Moskvada yaşayan azərbaycanlı milyarderlər İlham Rəhimov və Qod Nisanov (yəhudi əsilli) “Food city” bazarında Ermənistanın kənd təsərrüfat məhsullarına qadağa qoydu. Bu, Ermənistan iqtisadiyyatına ciddi itkilər yaşadan mühüm addım idi.
Bəs belə bir mühüm, həlledici situasiyada Türkiyə və Gürcüstan qonşu dövlətlər olaraq, Ermənistana qarşı hər hansı qadağa ilə çıxış edə bilərlərmi?
Milli Məclisin deputatı Eldar Quliyev Azsiyasət.com saytına açıqlamasında bildirdi ki, Serbiyanın Gürcüstan vasitəsilə Ermənistana silah-sursat göndərməsi heç cür anlaşılan deyil: “Buna inanmaq istəmirəm. Amma məlumdur ki, Gürcüstan o silahları Ermənistana buraxıb. Mən vaxtilə Serbiyada da olmuşam. Orada ümumilli lider Heydər Əliyevin heykəli də qoyulub. Bizim orda səfirimiz də var, Eldar Həsənov. Biz Serbiyaya çox kömək etmişik, mən başa düşə bilmirəm, bu qədər hörmətdən sonra onlar niyə belə addım atıb. Bizim orada yol infrastruktrunun qurulmasına böyük dəstəyimiz olub, eləcə də zaman-zaman Serbiyaya dostluq nümayiş etdirmişik. Biz müsəlmanıq, biz dəfələrlə öz varlığımızı onlara sübut etmişik. Prezident İlham Əliyev onlara etimad göstərərək köməkliklər etdi. Amma onlar bu gün nə etdilər? Bu gün onlar bizə kömək etmək əvəzinə, işğalçı, terrorist Ermənistana kömək etdilər, ermənilərə minomyotlar və müxtəlif kalibrli silahlar göndərdilər. Mən Serbiyadan bir o qədər incimirəm, amma Gürcüstandan çox inciyirəm. Beynəlxalq təşkilatlarda görüşəndə mən gürcülərə sözümü deyəcəm”.
E.Quliyev onu da qeyd edib ki, Qod Nisanov bizim yerlimizdir, o, yəhudi əsilli olsa da, həmişə Azərbaycanın milli mövqeyindən çıxış edib: “Ermənilərə qarşı haqlı prosesin başında duran şəxs çox hörmətli İlham Rəhimovdur. Bilirsiniz ki, İlham müəllim Tovuz rayonundandır. Ermənilərin Tovuzda törətdiyi təxribatlar hər birimizə təsir edir, o cümlədən də İlham müəllimə...”.
E.Quliyev deyib ki, bu məsələdə Türkiyədən nəsə tələb etmək doğru deyil, çünki Türkiyənin Azərbaycanla bağlı mövqeyi tam aydındır: “Türkiyə bizim qan qardaşımızdır. Türkiyənin Azərbaycana da, Ermənistana da olan münasibətini bütün dünya bilir. Cəbhədəki döyüşlər zamanı elə ilk dəqiqələrdən Türkiyə öz qardaşlıq mövqeyini ortaya qoydu. Türkiyə bütün dünya sübut edib ki, sabah müharibə də olsa, Azərbaycanın yanındadır. Əsrlə boyu ermənilər Türkiyəyə və Azərbayacan qarşı düşmənçilik ediblər. Biz heç kəsin torpağına girməmişik, ermənilər bizim torpaqlara giriblər, dəfələrlə Türkiyədə də təxribatlar törədiblər”.
