Mirkazım Seyidov Lavrovun fikirlərini şərh edir: "Razılaşmadığım məqamlar çoxdur"
“Azərbaycan bundan sonra daha çevik qərarlar qəbul etməlidir. Bunun üçün ortada ciddi siyasi iradə olmalıdır. Prezident İlham Əliyev belə bir iradəyə malik olduğunu dəfələrlə sübut edib. Dünya və ölkəmiz üçün həssas bir məqamda Qarabağın ildırımsürətli planla işğaldan azad edilməsi bundan sonrakı proseslərdə də ölkəmizin rolunun artacağının, dünyanın əsas güc mərkəzlərindən birinə çevriləcəyimizin göstəricisi hesab oluna bilər. Amma bununla belə, regional və qlobal şərtlər sürətli şəkildə dəyişir”.
Bu fikirləri Azsiyasət.com saytına açıqlamasında BDP Təşkilat Komitəsinin sədri Mirkazım Seyidov bildirib.
O qeyd edib ki, bundan sonra daxili idarəçilik mexanizmləri əhəmiyyətli müstəviyə keçməli, dövlət-vətəndaş münasibətlərini möhkəmləndirən ideoloji addımlar atılmalıdır:
“Eyni zamanda, diaspor fəaliyyətimiz xarici siyasətin daha effektiv bir tərkib hissəsinə çevrilməli, ölkədə ədalət prinsipləri bərqərar olunmalı, rüşvət və korrupsiyaya qarşı amansız mübarizə aparılmalı və bütün sahələrlə bağlı ideoloji konsepsiyalar hazırlanmalıdır. Yeganə yol budur, əks halda dövlətimizi, xalqımızı gələcək təhlükələrdən qorumaq çətin olacaq”.
M.Seyidov Rusiyanın XİN rəhbəri Sergey Lavrovun bu gün mətbuat konfransında səsləndirdiyi fikirlərə də münasibət bildirib:
“Lavrovun fikirlərində Azərbaycan üçün müsbət məqamlar çoxdur, amma razılaşmadığım məqamlar da az deyil. Onun “Bizim qondarma “Qağlıq Qarabağ”ın müstəqilliyini tanımaq fikrimiz yoxdur” fikri bir çox məsələlərə aydınlıq gətirdi. Amma Ermənistan rəsmilərinin Dağlıq Qarabağa səfər etməsi ilə bağlı Lavrova ünvanlanan suala verdiyi cavab bizi qane edə bilməz. Lavrov bunu humanitar səfərlər kimi qiymətləndirir. O zaman sual olunur: bu Ermənistan rəsmiləri qondarma rejimin bayrağı altında niyə görüşlər keçirirlər!? Deməli, bəzi məsələrlə bağlı etiraz etməkdə tam haqlıyıq”.
