Azərbaycan Zəngəzuru necə geri alacaq? - Xəyallar gerçək olur

Prezident İlham Əliyevin Zəfər paradında Zəngəzur, Göyçə mahalları və İrəvanın Azərbaycanın qədim əraziləri olduğunu vurğulaması Ermənistanı təşvişə salıb. Ermənilər hesab edirlər ki, Ermənistan Azərbaycan və Türkiyə arasında bölünə bilər. İki gün öncə Türkiyə televiziya kanallarında Zəngəzurla bağlı yayımlanan görüntülər də onların qorxusunu artırıb. Görüntülərdə Zəngəzur Muxtar Respublikası əks olunmuşdu. Erməni ictimai-siyasi fəalları hesab edir ki, İkinci Qarabağ müharibəsi hələ bitməyib və bu gedişlə Azərbaycan qədim ərazilərini də geri tələb edəcək. Bir sıra siyasi ekspertlər isə düşünürlər ki, Azərbaycan müdafiə mövqeyindən hücum mövqeyinə keçib. İşğal edilən ərazilərə vurduqları ziyana görə hesablanan yüz milyardlarla dollar təzminat tələbinin fonunda bu yeni strategiya Ermənistanın başını çox ağrıdacaq.

Azərbaycan insanını isə indi bu düşündürür: Öz qədim torpaqlarımızı hansı qaydada geri ala bilərik?

Azsiyasət.com xəbər verir ki, mövzu ilə bağlı bakupost.az-a danışan Azad Demokratlar Partiyasının sədri, təhlükəsizlik məsələləri üzrə ekspert Sülhəddin Əkbər bildirdi ki, Azərbaycan Ermənistana qarşı böyük miqdarda müharibə təzminatı irəli sürməlidir: 

“Ermənistanın isə məlumdur ki, həmin təzminatı ödəmək imkanı yoxdur. Tarixi əsaslandırmadan əlavə, həm də Azərbaycan tərəfi müharibə təzminatı olaraq Ermənistandan məhz bu torpaqları tələb etməlidir. Təbii ki, tələb zamanı bu əsaslandırma da istifadə oluna bilər. Yəni, Azərbaycan təzminat olaraq Zəngəzuru geri ala bilər”.

S.Əkbər əlavə etdi ki, ümumiyyətlə, bu müharibə geopolitik müharibədir: 

“Buna regionun geopolitik inkişafı konktekstində baxmaq lazımdır. Həmçinin, nəzərə almaq lazımdır ki, Zəngəzurun alınması təkcə Azərbaycanın maraqlarına uyğun deyil, eyni zamanda, regionun inkişafında maraqlı olan bir sıra böyük güclərin də marağındadır. Zəngəzurun geri qaytarılması Böyük Britaniya, Çin, Türkiyə və İsrail kimi böyük dövlətlərin marağındadır. Vətən Müharibəsinin gedişatında bu dövlətlərdən bəziləri açıq, bəziləri isə gizli şəkildə Azərbaycana dəstək verirdilər”. 

Ötən gün Zəfər paradında prezident İlham Əliyev bildirmişdi ki, əslində, Ermənistanın aqresiv təcavüzkar siyasəti hələ 80-ci illərin sonlarından başlayıb: 

“O vaxt indiki Ermənistan respublikasında yaşamış 100 minlərlə azərbaycanlı öz dədə-baba torpaqlarından didərgin salındı. Zəngəzur, Göyçə, İrəvan mahalı bizim tarixi torpaqlarımızdır. Bizim xalqımız bu torpaqlarda əsrlər boyu yaşayıb”.