"Ukrayna Silahlı Qüvvələri əks-hücum üçün "döyüş meydanı formalaşdırır..."

"İşğalçılar artıq USQ-nin cəbhədəki taktiki əməliyyatlarının hər birində böyük hücumu görərək isterikaya düşməyə başlayıb..."

Ukrayna Rusiyanın müdafiəsini "yumşaltmaq" üçün Rusiya obyektlərinə uzaqdan zərbələr endirir

Ukrayna Silahlı Qüvvələri (USQ) çoxdan gözlənilən əkshücum ərəfəsində "əməliyyatlar formalaşdırmağa" və hücum əməliyyatlarına başlamaq üçün döyüş meydanının hazırlığına başlayıb".

"Azsiyaset.com" xəbər verir ki, bu barədə CNN telekanalı məlumat yayıb.

Məlumatda deyilir ki, bu, özünü Rusiyanın silah anbarlarına, komanda mərkəzlərinə və texnikanın cəmləşdiyi yerlərə zərbələrin endirilməsində göstərir.

ABŞ-ın yüksək vəzifəli hərbi nümayəndəsi nəşrə izah edib ki, bu, iri hücum əməliyyatları ərəfəsində standart taktikadır.

O, xatırladıb ki, ötən il Xarkov vilayətinin və Xersonun azad edilməsi ərəfəsində də analoji olaraq "döyüş meydanını formalaşdırmaq" üçün  Rusiya obyektlərinə zərbələr endirilib. 

Pentaqon nümayəndəsi hesab edir ki, hücumun əsas hissəsi başlananadək hazırlıq əməliyyatları bir neçə gün ərzində davam edə bilər.

Bundan başqa, Rusiya obyektlərinə uzaqdan zərbələr endirilməsi kampaniyası düşmənin dezinformasiyasına yönələ bilər.

Nəşrin həmsöhbəti qeyd edib ki, Xarkov hücumu ərəfəsində Rusiya müdafiəsinin buna oxşar "yumşaldılması", demək olar ki, olmayıb.

"Bu, ildırımsürətli yerüstü hücum olub. Hazırlığın çox hissəsi körpülərə, döyüş sursatı anbarlarına və komanda mərkəzlərinə uzaqdan zərbələr endirməklə Xersonun payına düşüb. Onların əksəriyyəti HIMARS-larla həyata keçirilib", - mənbə deyib.

USQ-nin əks-hücumu - bəlli olanlar

Ukrayna prezidenti Zelenskinin fikrincə, Ukraynaya əkshücum üçün hələ zaman tələb ediləcək. O cümlədən hücum əməliyyatları üçün əlavə silah tədarükü gözlənilir.

Bu arada isə işğalçılar artıq USQ-nin cəbhədəki taktiki əməliyyatlarının hər birində həmin böyük hücumu görərək isterikaya düşməyə başlayıb.

Məsələn, bu ərəfədə "Vaqner qrupu"nun başçısı Priqojin bəyan edib ki, USQ-nin əkshücumu artıq tam gücü ilə gedir.